詹瑞文（詹sir）嘅舞台劇《男人之虎》，以為民請命、諷刺時弊見稱，最近四川大地震期間，莎朗史東所謂嘅天災報應言論，結果被外間狂轟，詹sir為咗幫大家出口氣，噚日以《男人之虎》嘅造型，去到旺角行人專用區，用拖鞋猛打莎朗史東嘅人形紙板，又邀請街上巿民向莎朗飛拖鞋發洩，引嚟大批巿民圍觀。
詹sir話：「原先好欣賞莎朗史東，但係因為佢今次亂噏，傷害咗好多中國人同香港人嘅心，所以今次發起呢項活動打醒佢。」詹sir話唔怕得罪荷李活嘅電影公司，佢話如果係驚都唔會夠膽鬧政府，更何況佢話就算打入荷李活都唔需要靠人咁話！
同道中人
其實詹sir噚日係宣傳佢喺今個月27號開始喺沙田大會堂舉行嘅舞台劇《男人之虎》，詹sir話今輯會以莎朗史東、副局長事件做故事題材，詹sir話睇吓用條褲焗腸，究竟要幾錢喎！擺明諷刺最近特首同政府俾人批評唔公開副局長助理薪酬單嘢啦！咁啱噚日詹sir行經民主黨喺行人專用區擺嘅攤位，佢哋就係抗議緊呢樣嘢而搞緊簽名抗議行動，詹sir見到同道中人，當然即刻走埋去簽名捧場，佢仲同何俊仁、李永達握手互相支持㖭！
採訪、攝影：張俊銘