金融風暴發生咗10年，唔少人忘記唔到當年慘況，心水清嘅網友仲將10年前恒指走勢同近排嘅走勢比較，竟然發覺前段走勢差唔多，但10年前後段走勢一路跌（附圖1及2），擔心歷史會唔會重演？
網友Johntt話，「歷史不斷重演，呢啲係金融市場定律，冇得改變。」drinkerbbc都有同感，話10年前美國樓市又係有事，年幾兩年都搞唔掂，同𠵱家情況好似。
之不過，自稱國壽榮譽股東嘅網友就唔認同，「其實唔係上就落㗎啦，持正股唔死得嘅。」神經俠女亦覺得，逢親下降軌都差不多，唔使咁多心。
趁後生全職炒股
前嗰排大牛市，個個都話全職炒股，估唔到今時今日個市咁，仲有人炒股當返工，網友唐狗Lin話：「趁後生唔博，唔通老咗先博。」monchhichi2008話：「工字不出頭，你睇以前炒樓嘅人，發到豬頭咁，𠵱家炒股嘅人，都可以發到咁。」佢仲話，只要儲夠子彈（錢），都會全職炒股。全職炒股嘅totoyou講出佢嘅大計：「我預咗博5年，希望5年後可以買到間似樣嘅屋。」
不過，網友無前途就話：「你估全職炒股好容易！祝大家好運。」casab話：「炒股唔係一定賺，但返工就一定賺。」過來人casiokent提醒，「keep住利潤最難，因為戰線咁長，EQ小嘅人不宜全職炒作。」