一度掀起城中熱話的無綫劇集《溏心風暴》將會在本周五（13日）於劇集台重播，因為原班人馬上陣的《溏心風暴之家好月圓》趕拍得如火如荼，所以移師往外景場地進行宣傳，不過活動正值在中午最熱的時段舉行，高溫下熱得令人透不過氣來，加上大家又欠缺休息時間，所以不少演員均熱得木口木面，失眠的李司棋更說：「以為自己就嚟死！」
因為《家好月圓》目前處於趕拍的階段，為免因度期而影響進度，所以《溏心風暴》「經典再現劇集台」的宣傳活動在西貢大網仔燒烤場內進行，活動進行前夕正在拍攝燒烤的場面，烈日當空下又要對着火爐做戲，即使大家早已帶備防曬、消暑用品，亦熱得木無表情。
連踩30粒鐘
大契李司棋坦言不習慣在烈日下開工，她說：「我之前連踩30幾個鐘，點知前晚瞓咗3個鐘頭就紮醒咗，之後仲失眠，真係異常辛苦，其實我覺得好攰，好眼瞓但係又瞓唔着，而且又唔想講嘢，成個人都手軟腳軟，差啲以為自己就嚟死！」
楊怡感頭暈
抱病在身的楊怡更覺得有點頭暈，她聲沙沙地說：「我前幾日已經覺得唔舒服，本來諗住出一身汗會好啲，點知出完汗仲覺得唔舒服，仲覺得有啲頭暈，我惟有飲多啲水補充水份。」
楊怡更笑言突然覺得身邊好多人關心，她笑說：「我最初以為小病是福，病吓可以加速新陳代謝，而且仲有唔少人問候我，見到我猛問睇咗醫生未，點知原來佢哋怕俾我傳染，我都係俾人傳染呀！」
另外，鍾嘉欣對於有網民批評她皮膚差一事，她說：「之前我連踩4組戲，唔夠瞓梗係皮膚差，不過𠵱家休息咗一輪，皮膚已經好咗好多。」
採訪：何慧斯
攝影：葉君海