獅子行個仔「老恒」恒生銀行（011），喺英明神武嘅大班柯清輝領導下，股價真係升到阿媽都唔認得，上星期連番逆市上升，連匪夷所思嘅「私有化」論都出動埋，居然話5倍幾市賬率嘅恒生，唔排除俾淨係得倍幾市賬率嘅阿媽──滙豐（005）私有化，成為炒升嘅藉口，上個禮拜五收報163.4銀。正一係市場要你升，仲易過啃碗出前一丁。誠如柯總話齋，恒生已經擺脫派息股行列，成為增長股嘅生力軍。
僅次澳紐銀行
唔講唔知，原來恒生呢間本地銀行，喺全球銀行嘅市值榜排名，已經靜悄悄升咗好多，按上月底統計，恒記已升至全球第43位。佢哋間寶號今年2月底，慶祝75歲生日時，按去年底排名仲係第48位。
咁世界市值排名高恒記一位嘅銀行（即係第42位）又係邊家呢？原來係同滙豐恒生兩母子好有淵源嘅銀行──就係由獅子行前亞太區行政總裁、即滙豐前「二班」邵銘高（MichaelSmith），舊年跳槽後坐鎮集團CEO嘅澳紐銀行是也。「肥仔邵」仲喺滙豐嗰陣，亦身兼恒生銀行董事長一職，你話係咪好有緣嘞！