馬場廂房內，碰到前高官。呢位前高官一向好少到馬場，屬稀客之類。但係睇唔出，前高官對賽馬甚有認識，頭四場場場收錢，於是左丁山問佢：「如果你仲係做官，喺馬場贏錢使唔使向政府申報㗎？」前高官反應得快，「我每場落雞仔注，贏四場獨贏位置都係熱門，點使申報呀？其實我做官幾十年，從未見過有同僚在馬場贏錢多到要申報嘅！」唔係冇，好少啫，聽講好耐以前曾有官員贏過七位數字，向政府申報。但卒之要飲咖啡，提神啫啩？
唔講馬，問吓前高官：「公務員薪酬是否要保護私隱，唔可以公開？」前高官大笑：「唔好講玩笑，只要知道你幾時升做D幾，大家好容易估計到你份糧有幾多，準確過估韋達贏馬，毫無秘密可言。用此為藉口嚟拒絕公開政治委任副局長與政治助理薪酬，簡直攞嚟講，邊度可以講得掂做過公務員事務局局長嘅王永平吖，政府係冇道理㗎，總之呢次副局長與政治助理風波，係政府嘅公關大災難，對輿論後知後覺。」冇理由處理得咁曳嘅。
估唔到前高官老馬有火，加入陳祖澤、王永平陣營，批評口徑一致，睇嚟特區政府現時啲高官嘅處事方法，與傳統不同，故此引來上一輩官員不滿。正是一朝天子一朝臣，唔講得咁多㗎嘞，不如講番跑馬。適值馬場電視播映「好爸爸」在東京馬場晨操，於是勾起回憶，去年在東京，見到好多日本媽咪推嬰兒車帶仔女入馬場，港燦大鄉里視為奇景。左丁山問前高官：「點解香港唔畀兒童入馬場呢？」前高官嘆氣：「香港有好多偽善之人，成日話馬場不宜兒童進入，睇跑馬會助長賭風喎。其實最近話馬場投注復甦啫，平均每次賽馬投注額未夠十億元。喂，最大嘅賭場在港交所，每日窩輪成交額閒閒哋有百幾億。你話買賣窩輪係投資，而買韋達做騎師王係賭錢呀？其實買韋達可能仲穩陣，回報率（一日之內）高五至八成㖭。啲師奶買窩輪，唔係賭錢算係乜？」咦，點同呢，賭窩輪係為香港國際金融中心作出貢獻，賭馬就係助長賭風，唔怪得百幾年來對本地慈善事業有好大貢獻嘅馬會感到無奈。