「家駒，我好珍惜同佢一齊嘅時間，但係好無奈停留喺緬懷裏嘅珍惜，因為我已經做唔到任何嘢，事實佢亦都唔喺呢個空間。要真真正正珍惜佢、對得佢住，就係做多啲好嘅音樂，盡量教育下一代，影響多啲人，唔好再諗或者再等。如果一個人死咗之後，仲會睇到我哋發生緊嘅嘢，如果佢睇住我，希望佢都望到：阿Paul，你呢條友都好硬淨！」
「佢嘅作品長存」
黃貫中是條硬漢，但重提家駒離世，15年來的錐心之痛從未忘記，他傷感地說：「嗰件事衝擊幾大，佢離開係一個意外，我睇住佢好似一朵花喺一個禮拜內慢慢枯竭，而你乜嘢都做唔到，淋水唔係、倒泥又唔係、施肥又唔係，呢種感覺好痛苦，係對我哋身邊所有人一種煎熬。如果家駒仲有知覺，要我同佢講一句說話：『你知唔知我𠵱家真係好辛苦？』直至到今日，我都冇辦法釋懷。」
家駒的離開，令Paul對生命重新詮釋：長命不等同價值。他說：「有啲人100歲都唔知自己做緊乜嘢，或者坐擁幾百億身家嗰啲，一個人喺間房做嘢之嘛。相對於家駒嘅生命，31年，但係咁延續，唔會停，我哋每次提起佢或者唱佢嘅歌，嗰剎那佢會翻生。
「佢嘅作品可以長存，佢走咗，但喚醒好多人，所以佢嘅生命唔在乎長短，我自己都唔係好想講，但如果長啲，大家又會唔會咁睇？對佢嘅愛係咪仲係咁深？呢個係個好乞人憎嘅問題，究竟隊band係咪一早拆夥？假如家駒喺度，Beyond一早已經解散咗，呢個係我肯定。我點會唔知佢，佢要做嘅嘢太多，點會甘心一生人只係做一樣嘢？事實上佢在世時已經爆響口講出嚟，有時生命就係咁諷刺。」
被迫拍《淘氣雙子星》
家駒留給Paul的回憶太多，有悲也有喜。89年Beyond首次拍劇，四子被經理人捉去無綫試鏡，僅得Paul和家強被選中演出《淘氣雙子星》，Paul苦口苦面向家駒詐型，回想前事他卻忍俊不禁：「我梗係唔想做啦，我同佢哋講唔制㗎，家駒話『片頭同片尾曲都係我哋喎，去啦，《大地》你唱埋啦，食住個勢上呀！』佢幾咁聰明！
「之前我哋一路冇人識，但我都仲係唔明，我喺band度唔講嘢㗎喎，拍嘢？有冇搞錯？黐線咩？但佢已經洞悉先機，佢話『你咪永遠小圈子囉，你要入屋就要拍嘢㗎啦，為隊樂隊做吓啦。』事後諗番，都係當時自己戇居啫。」