從小，黃家強就對二哥黃家駒非常崇拜，所以家駒出殯當日，多年來習慣被兄長寵愛及保護的家強在扶靈時，傷心得如天塌下，那心酸的場面依然歷歷在目。15年後，家強結了婚，做了爸爸，他說：「我好想同佢講，唔使再擔心我。由細到大家駒都覺得我懦弱啲，驚我照顧唔到自己，其實當佢走咗，我真係好無助，要面對好多嘢，但又令我好急速成長。不過我都有自暴自棄過一段時間，成年渾渾噩噩，唔想掂音樂，唔想見人。」
「一直喺我身邊」
家強走出喪兄之痛的陰霾後重新振作，2000年他開始單飛發展，近日更負起重責，舉辦紀念家駒的展覽和今晚舉行的紀念音樂會。過程中，他知道歌迷毋忘家駒，感動得無以復加，他說：「家駒喺樂壇10年，帶畀樂壇好多衝擊，我覺得好神奇，會更加崇拜佢。15年唔係短時間，但每一個人都冇忘記佢，好掛住佢，今次發起呢件事嘅迴響，令我感受到佢嘅威力同精神，我為佢好驕傲。雖然成個活動付出好多，但帶畀我好多回憶，睇番好多片同遺物，佢好似重生一樣，冇離開過我，一直喺身邊陪住我。」
家駒在生時，家強已愛黐着他四圍去，兄弟這邊嗌交那邊夾band，從沒隔夜仇，家駒總是細心教他，從不動粗，惟獨頂頸多過食飯。家強說：「細個時，家駒恰我咪打佢囉。嗰時放學後得我同佢喺屋企，佢點得我多咪發爛渣，頂頸多但好小事，細個為幾蚊雞，大個為100蚊都嘈餐死。有次我話佢『你借我一嚿水好還啦喎』，佢話佢還咗，就係死拗呢個位，嘈得好激烈，阿榮（葉世榮）喺隔籬話算啦你哋。其實唔係100蚊嘅問題，係啖氣嘅問題。」
《俾面派對》寸名人
回想前塵往事，家強時而微笑，時而眼眶微紅。他上四年班時在家中觸電，家駒曾救他一命；兩兄弟又試過齊呃阿媽買魚糧，其實上街玩，結果被阿媽捉到正，出動雞毛掃打到他們飛起。童年的家駒很百厭，愛逃學去街，兄弟夾band後繼續笑話一大堆，攞膽作有《阿拉伯跳舞女郎》的怪異中東look配閃亮眼影，家強大笑說：「嗰時公司幫我哋做形象，你指住我笑我指住你笑咁囉，但我哋化妝化到自己好核突，啲眉好似炭條咁，咁多個形象入面，短褲同阿拉伯最鬼棘手㗎啦。」
提起唱歌，家強想起炮製《俾面派對》的故事，原來是家駒為他出頭所致，家強說：「因為有個名人生日，公司話一定要捧場，我都唔識佢做乜要去呀？我喺阿哥面前話唔想去，三唔識七去乜呀去！阿哥話係啦，寫隻歌鬧吓佢先，結果佢就寫咗《俾面派對》。」