上市公司搵獨立董事，好多時會搵名人，貪佢哋有公信力、可以提升公司形象，不過，內地《每日經濟新聞》為1500多家上市公司名人獨立董事做咗個調查，呢個調查係根據內地上市公司已公佈嘅年報，對獨董履職情況做分析，結果發現唔少名人獨董出席率低於90%，原因係名人一般都身兼數職、業務繁忙，成日缺席董事會。
年薪逾五萬人仔
報道仲點名話北京大學校長助理于鴻君，喺包鋼股份8次董事會中，6次冇到；上實集團副總裁包季鳴，喺雅戈爾18次董事會中，10次缺席。雖然人唔到，但袍金就照袋，上市公司通常對獨董都好疏爽，據調查，大陸獨立董事年薪普遍5萬人仔以上。
唔出席董事會唔重要，可能佢哋喺其他方面有貢獻呢！不過，調查發現名人獨董雖然係公司所屬行業嘅專家，但因為太繁忙，根本冇時間研究同分析公司情況，所以只係畀到形式化意見。
調查仲發現，上市公司獨董佔一半嚟自學術界，例如各大知名院校學者、專家、主任或者教授，因為有學術上嘅專業知識。其他如各行業協會專家，亦係熱門人選，另外仲有政府高官影子，典型例子係外經貿部（現商務部）前副部長龍永圖就係國壽（2628）獨立非執董。