1962年6月10日，黃家駒出生；1993年6月30日，他意外身亡。家駒的人生只有短短31年，但他憑豪邁沙聲、出神入化的結他造詣和超班的音樂才華，帶領Beyond唱出一首又一首的大熱搖滾歌曲，為本地樂壇締造神話，更令80年代band友抬頭。
今日是家駒生忌。15年前，他在日本錄影節目時意外墮下舞台，由昏迷到離世的7天裏，他沒留下一句話，靜靜地翱翔於另一個海闊天空的國度。家駒的一生像流星劃破長空，為樂壇記載過光輝歲月，時至今日，大家對他依然無法忘懷。
如果說約翰連儂（JohnLennon）當年突然離世，令披頭四（TheBeatles）的英倫殿堂搖滾王者地位空前絕後；那家駒之死，也該令Beyond在香港樂壇更添經典。今晚，Beyond三子將會重組，在「別了家駒十五載…海闊天空音樂會」上高唱《海闊天空》，紀念這位好兄弟。 撰文：朱倬誼、陳月媚、蔡如玉、比華利
二樓後座滿笑聲
最窮的時候，也是Beyond最快樂的時候。聞名的Beyondband房「二樓後座」，是世榮家人的物業，位於花墟唐樓。當年這間千呎爛屋被間成數間板間房，租給幾戶人家，band房是其中一間，面積不足100呎，五子蝸居斗室，但舊日的band房滿是笑聲。
二樓後座回憶太多，最有趣的是當時有位阿伯與Beyond為鄰，他們稱阿伯為石山佬，因他愛玩盆栽砌山石，石山佬難頂他們夾band嘈喧巴閉，每晚着孖煙囪拍門投訴，令五子的女友超眼寃，世榮便送他舊雪櫃意圖息事寧人，但他雪櫃照收投訴照舊，還賴死欠租，氣得世榮剪他電線。後來石山佬搬走，二樓後座擴充營業，重新裝修又鬧出笑話成籮。
五子裝修high到暈
Beyond五子裝修不求人，Paul和劉志遠整隔音膠時狂嗅天拿水味，high到幾乎暈低。家駒和世榮負責鏟起舊地板及鋪英泥，家駒諗出屎橋，着大家用水搓泥。結果呢？世榮笑說：「個個隻手都爛晒、甩晒皮流血，因為啲泥有腐蝕性。」
劉志遠：佢好多女友
Beyond前成員，86年加入任結他手，88年離隊。
劉志遠和家駒情誼深厚，他大讚家駒聰明、有天份，他說：「佢仲係一個多情浪子、一個star，雖然好多暗瘡，但好有魅力，佢係文化沙漠上嘅一朵花，你會覺得佢特別靚。」他們也曾共度最窮但最開心的日子，遠仔憶述說：「嗰時我哋兩、三個人share一碟飯，又試過夾錢買一磅麵包，買砂糖搽。」
因拗撬離隊
遠仔於1988年離隊，全港資料都寫他離隊的原因是留學美國，今天遠仔終說出真相：「假㗎，作㗎咋！係我覺得同佢哋性格唔夾，細路仔時自己意氣用事，同家強有少少拗撬，話唔玩囉。其後知道Beyond搵錢都不知幾後悔，係有一刻難受，都返唔到轉頭啦，但後來自己都不停編歌，咁又死唔去。」
家駒的情史是謎團，當年林楚麒以未亡人身份出席其喪禮曾哄動一時，遠仔說：「當時我想擋佢，行開啦你，家駒幾個女朋友都有嚟到，林楚麒比較誇張，有少少粵語長片咁『嗚嗚嗚，你唔好走啦！』我見過家駒起碼有四、五個女朋友，佢換畫好似轉台咁，我羨慕佢有好多女朋友㗎。」
陳少寶：視野廣闊
陳少寶87年擔任新藝寶唱片公司總經理，一手捧紅Beyond。
1987年陳少寶主管新藝寶唱片公司時，有天Beyond當時的經理人陳健添來找他，問他有沒有興趣簽這樂隊，後來他跑到高山劇場看Beyond音樂會，真沒料到台下反應如此熱烈，細聽下才發覺這五個年輕人有其獨特的音樂風格，若經過適當調整，必可在樂壇殺出血路，所以陳少寶答應與他們簽約出唱片。
在這三年的合作中，陳少寶與Beyond建立了情誼，他日前說：「87年初初簽Beyond，見到佢幾個頭髮長長，我就問佢哋剪短頭髮得唔得，後來佢哋就好聽話去剪髮，咁公司就同佢哋出咗《秘密警察》呢張碟，反應都唔錯。當時我同家駒講，你哋??家要喺樂壇站穩腳，歌路唔可以走得太偏鋒。喺合作嗰幾年，其實佢哋幾個一啲都唔反叛，家駒好有思想同視野，諗法比其他成員成熟好多，寫嘅歌好有世界觀。
「唔會輸畀日本人」
在90年當Beyond決定要去日本發展時，離港前家駒單獨約陳少寶吃了一頓晚飯，他說：「當時家駒同我講，已經決定去日本發展，佢哋想過去同日本嘅樂隊較量吓！佢係帶住失望咁離開香港樂壇，家駒成日同我講，香港已經冇樂壇，只有娛樂圈，佢話做得好冇癮，所以想出去闖吓！佢問我有乜忠告，我就同佢講日本有好多勁旅，佢話唔怕，只要佢哋肯努力，一定唔會輸畀日本人。」
梁翹柏：捱窮開心
梁翹柏，前組合浮世繪主音，15歲認識家駒，91年Beyond演唱會任和音。
梁翹柏十分欣賞家駒的音樂才華和誠意，他日前說：「記得當年我哋大家都只係鍾意創作英文歌，未入行時嘅家駒，對樂壇有好多不滿，我哋諗有乜嘢方法改變呢？最直接莫過於走入樂壇改變佢，於是由嗰時開始，我哋就一齊玩中文歌。我好欣賞家駒用號召力去改變同影響整個世界呢份精神。」
飲茶傾音樂
今年是家駒離世15年，時光飛逝，勾起梁翹柏不少難忘回憶，他說：「我哋嗰時一齊做過保險從業員，可惜成日call唔到客，俾老細詐型，最後大家都覺得白領工唔啱自己，索性唔做。記得我哋最『兜踎』時，會夾錢買煙去band房食，又試過去茶餐廳叫熱奶茶，貪佢有個壺同茶包，不停咁冲水，我哋叫一杯嘢飲就坐成晚，一邊傾音樂，嗰段日子係窮，但好開心。」
對於現在Beyond三子獨立發展，他說：「我好記得家駒嘅口頭禪『唔係Beyond需要我，係我需要Beyond』，希望佢哋可以延續家駒對音樂嘅精神。」
陳海琪：鐵漢柔情
陳海琪早年任職商台DJ時，與家駒在朋友聚會中認識。
家駒初出道時，希望Beyond的音樂可以讓更多人聽到，特別把收錄了Beyond音樂的錄音帶轉交當年任職商台DJ的陳海琪，希望她在節目中播出。
性格率直貪靚
海琪日前說：「當年接過家駒餅帶，都唔知點處置，因為當年電台係播大帶，而佢畀我嘅係一般家庭用嘅卡式帶，制式都唔啱，但我畀佢份熱誠打動，就攞咗餅帶返商台畀湯正川，大家聽過啲錄音質素係好差，但佢哋啲歌就好有創意同獨特風格。」
陳海琪決心要扶Beyond一把，結果他們順利闖樂壇，她說：「我好欣賞家駒對音樂嘅熱忱，就算當年懷才不遇，佢都努力做好本份，創作好歌。佢性格率直，但好貪靚，試過有次同佢做function，我好記得佢當日着咗件銀色外套，好鬼閃，佢未開騷時喺後台係咁姿姿整整準備，諗番佢嗰一刻，畀我好有鐵漢柔情嘅感覺。」
助手阿龔：愛食街邊喳咋
體重約310磅的阿龔，當年天天都湊着Beyond開工，住蘇屋邨的家駒車程最遠，所以會先接他，收工後尾站也是送他返家，每日這幾十分鐘的車程，造就這兩個男人獨處，感情就一點一滴累積起來。
鍾意蒲蘭桂坊
阿龔說：「家和萬事興，家駒口不停。嗰時已經叫家駒做黃伯，佢好多嘢講，聽都未聽得切又講，但佢講嘢有point嘅。」眼前的阿龔憶述故友依然難忘，他笑說：「佢鍾意蒲琴行，夜晚會去蘭桂坊、以前尖東嘅Station同新世界頂樓嘅Catwalk飲嘢，又會去深水埗街邊檔食喳咋，仲有尖沙嘴間韓國餐廳莊園。佢鍾意玩，又唔計較，難聽啲叫來者不拒，一收工就去食飯飲酒，佢又畀錢，好多人喺佢身邊係咁食係咁飲，但係佢一啲都唔介意。」
歌迷為偶像學結他
梁慧珠是家駒的忠實歌迷，14歲那年，她在電視上看到Beyond唱《阿拉伯跳舞女郎》被迷倒，追星生涯隨之展開，阿珠說：「我最鍾意家駒，佢好健談、爽直，鍾意講道理，又好照顧歌迷。」記得一次，Beyond在商台接受訪問至凌晨1時許，家駒離去時看見阿珠和一班女歌迷在等候，擔心她們的安全，逼令她們乘的士回家，可是阿珠等人不夠錢，家駒二話不說掏了100元出來，家駒的關懷與豪爽令她感動不已。
「親手寫譜畀我練」
後來，阿珠受家駒影響去學彈結他，更在琴行碰到他，他得悉歌迷受他感染愛上音樂，雀躍得主動說要幫阿珠試結他，阿珠說：「我話想學彈《舊日的足跡》，佢仲親手寫譜畀我練。」阿珠用盡方法接近偶像，曾當臨記演出《Beyond日記之莫欺少年窮》，更為了偶像加入傳媒行列，阿珠第一次訪問Beyond，家駒因胃痛缺席，一個月後四子離港到日本，家駒便一去不返。家駒離世當天，阿珠哭得不能自已，她說：「因為我係記者，當時有瞻仰遺容，未行到入去已經狂流眼淚。」
家駒自傳「為甚麼我會玩音樂？」
「玩音樂一定要有根！」12歲那一年，一位摯友的說話啓發了我……
那一年，一位摯友驟然問我一個措手不及的問題：「你究竟喜愛甚麼？」我毫不考慮回覆他：「各類運動，例如游水囉！」他又問：「聽歌呢？」我搔着頭，聳聳肩答：「歌？好像沒有任何感覺。」真的，以前對歌是冷感的。
大衞寶兒震撼我心
這位摯友跟朋友夾band，他對音樂早達狂熱程度，那陣子家姐常出席派對，轉瞬間，身旁的人漸漸感染我，我也潛移默化起來，於是我開始留意音樂潮流。第一次瞧見心儀的偶像，是在電視節目內，他一身標奇立異的打扮，演唱着70年代迷幻音樂，霎時，情緒被他的魅力懾着，他就是大衞寶兒（DavidBowie）。他的《1984》及《DiamondDogs》震撼人心，我心想：「他不是這地球的人！」自此我強烈追隨他，搜購他的唱片和海報。每逢發現一張珍貴的海報，真仿似如獲至寶的興奮呢！DavidBowie式的前衞搖擺，影響到我日後的音樂意向。
為甚麼我會玩音樂？要追溯至17歲，當年流行民歌，同學常彈結他𠱁女孩子，我覺得很無聊，完全失去意義，直到鄰居舉家搬遷，獨留下一支蒙上灰塵的木結他，我撿拾回家，夾band的摯友叫我洗亁淨，終於我用了十樽天拿水洗結他面，誰知結他面的lacquer（漆面）被腐蝕至如毀容一樣，我只好盡力擦掉那些lacquer，再滿心歡喜送給摯友，怎料他竟嫌面目全非，不肯收貨。
我實在不捨得就此棄於一角，惟有嘗試彈結他。坦白說，我喜歡吹色士風多於玩結他，但擁有一支色士風並不容易，於是我立志買參考書自學彈結他。
當我還是初哥之際，便加入了一隊業餘band，柴娃娃負責rhythmguitar的位置，對於音樂，我仍只限於懂得分別「好聽」和「不好聽」，其他則一竅不通。也許自尊心作祟，有一趟，隊中的主結他手大罵我一頓，說我技術太差，永無法成就大事，回家後，我很氣憤，好勝的心理迫使我發憤圖強，從未如此用心苦練，我對自己許下諾言，未來的第一個目標，就是要彈得比他出色！
《再見理想》償心願
年紀小的時候，從沒考慮過以音樂為職業。當然，父親也期望我有一技之長，結果我做過officeboy、鋁窗、冷氣工程、五金、電視台佈景員等。做得最長久的是跟世榮做保險經紀，但我天生性格害羞，說服力又不夠，總未能得心應手。
我常想，擁有一隊樂隊又怎樣？香港市場發展有限，太多有料之人，往往無用武之地。靠音樂為生，不被人取笑才怪！
1986年1月，我和阿Paul、世榮和親弟家強自資出版《再見理想》，各隊員純粹為興趣，從沒打算日後會繼續灌錄唱片，《再見理想》出街後，大家彷彿完成了心願……
節錄Beyond88年自傳《心內心外》
黃家駒大事年表
1962年6月10日：於香港出生。
1968年：入讀新會商會小學（左圖）。
1974年：入讀博允中學。家駒摯友組band玩音樂，他也開始留意音樂潮流，迷上大衞寶兒，激發他的音樂意向。
1979年：加入業餘band負責rhythmguitar的位置，有次被主結他手責罵技術太差，從此發憤圖強自學結他。
1983年：與葉世榮、鄧煒謙及李榮潮組成Beyond，在結他雜誌舉辦的結他比賽中奪得冠軍。其後鄧煒謙及李榮潮離隊，黃家強於84年加入。
1985年：結他手陳時安加入，後來因出國留學而離隊，於是Beyond邀請當平面設計的黃貫中加入，並於堅島明愛中心開了他們第一場演唱會「永遠等待」。
1986年：自資推出《再見理想》卡式帶，簽約Kinn's經理人公司，其後結他手劉志遠加入（右圖）。
1987年：Beyond推出首張EP《永遠等待》，其後推出EP《新天地》及首張大碟《阿拉伯跳舞女郎》，開始備受注視（左圖）。
1988年：劉志遠4月離隊，Beyond由五變四，後推出大碟《現代舞台》及《秘密警察》，出版自傳《心內心外》。歌曲《舊日的足跡》、《大地》及《喜歡你》等大熱。
1989年：推出EP《4拍4》，黃貫中和黃家強主演無綫劇集《淘氣雙子星》；其後推出以歌頌母親的作品《真的愛妳》，收錄該歌曲的專輯《BeyondIV》更獲雙白金驕人成績，同年Beyond假伊利沙伯體育館舉行七場「真的見證演唱會」，並推出唱片《真的見證》。
1990年：憑《真的愛妳》橫掃無綫《十大勁歌金曲》及港台《十大中文金曲》等頒獎禮。演出電影《吉星拱照》、《開心鬼救開心鬼》，推出EP《戰勝心魔》、大碟《命運派對》及國語碟《大地》，發展台灣市場。
1991年：四子前往非洲肯雅探訪貧民；主演電影《Beyond日記之莫欺少年窮》；首次踏足紅館，舉行五場「Beyond生命接觸演唱會」（右圖）。
1992年：轉投華納唱片公司，並與日本經理人公司Amuse簽約，正式開拓日本市場，推出首張日語專輯《超越》。家駒主演的電影《籠民》上映（左圖）。
1993年：推出專輯《樂與怒》，歌曲《海闊天空》成為Beyond最後一首由家駒主唱的派台作品。
1993年：家駒在日本富士電視台拍攝遊戲節目，不慎由3米高台墮下，頭部重創昏迷，搶救7日終告不治，終年31歲（右圖）。
資料來源：《蘋果》資料室
