副局長同政治助理，引發嘅社會討論，未有迹象會停。冇辦法，今次啲人選同佢哋嘅背景，拍埋佢哋要擔當嘅角色，就有如送畀每個香港人一塊鏡。畀大家照吓個心，睇吓心底裏乜嘢重要同唔重要。
情況就有如早前無綫電視節目《一百萬人的故事》，照出社會裏嘅貧困。今次啲政治人選，就照出社會裏民建聯中人，攞外國國籍嘅愛國偽君子（佢哋真係覺得，高級黨員入外國國籍，效忠英女皇，對民建聯真正愛國嘅成員係冇嘢）。
工作經驗少有原因
今次亦照出，我哋香港人對請人做嘢，履歷、工資關係嘅情懷。例如，創辦Roundtable，候任食物及衞生局長政治助理陳智遠。被人笑話佢之前人工得幾萬，得三年工作經驗，𠵱家月薪有十幾萬。十幾萬月薪，即係計年薪，攞個齊頭數，陳智遠就係《一百萬銀的故事》。爛gag？係。
不過，如果因為陳智遠得三年工作經驗，所以大家覺得佢唔應該做政治助理，我就會話唔公平。陳智遠28歲，孫柏文30歲，如果三年一代，我同佢就同一代。作為同代人，我係完全明白點解佢嘅工作經驗咁少。
我同佢嘅分別，就係我曾經長時間雙失，佢就冇雙失，起碼冇失學，攞多兩個碩士學位。點解會有咁嘅分別？因為當年我一廂情願，信咗特首董建華嘅「經濟將會短期之內復蘇」。當時覺得「短期之內」應該係一年之內，如果一年之內有工做，咁就唔可以攞啲一年長嘅學位。不過，陳智遠就冇我咁儍咁天真。佢就「一注獨贏買經濟差」，就係咁，所以有兩個碩士學位。
重返校園因經濟差
再講，有《金手指》fan屎喺我個blog度，話陳智遠嗰兩個碩士「流流哋」。話識大學教育嘅人，都會覺得攞嗰兩個碩士嘅人，唔慌勁得去邊。我冇能力反對呢個論調，不過就算嗰兩個碩士「流流哋」，大家一定要明白點解陳智遠都會去攞。橫掂一年之內都冇入職機會，就不如重返校園，有咁癲玩咁癲，有咁喪玩咁喪。學位？學嘢？醉翁之意不在酒。最後，如果因為陳智遠嘅工作經驗，令特首曾蔭權有麻煩。只不過等於曾特首，再一次要為董建華留下來嘅政治炸彈拆彈。未見到政治助理做啲乜之前，我挺陳智遠！
金手指網誌： http://phatdat.blogspot.com