45歲的方中信雙喜臨門，三日內先做老襯後做老竇，太太莫可欣前日為他剖腹誕下5.7磅B女後，榮升人父的方中信興奮莫名，晚上即偕友去跑馬地蒲吧慶祝；昨日他再到醫院探望妻女時心情仍high，指囡囡似他大耳珠、鼻高高，還自稱是慈父相，老婆則是壞人角色。
方中信和莫可欣在三日內火速完成人生兩大事１，上周六他們註冊結婚後，前日莫可欣已在跑馬地養和醫院剖腹誕下體重5.7磅女嬰，方中信更緊張得兩度去醫院探望妻女。晚上近11時他第二次到院時雙頰通紅，似曾喝酒，他還說不會留在病房陪太太過夜：「𠵱家唔得㗎啦，醫院唔可以過夜呀。」
大耳珠似爸爸
其後方平和太太鮑起靜及數名朋友到場，10分鐘後又隨方中信離開醫院，齊往附近的Alabar劈酒狂歡，慶祝方中信雙喜臨門，蒲足個半鐘後才由該店老闆杜貞貞護送搭車。
昨午12時許，方中信駕着價值近200萬的Audi新跑車再到養和，逗留兩小時後離開，他形容心情仍開心又擔心，且未為女兒改名：「同家人商量緊，希望帶畀佢運氣，夾緊時辰八字。」至於BB似爹哋抑或媽咪？方中信說：「耳仔比較似我，因為耳珠比較大，鼻高高咁，其實兩個都似嘅。」雖然女兒較輕磅，但非常健康，由於仍留BB房，故太太未決定會否餵人奶。
方中信又主張一個夠晒數，問他會否縱壞女兒？他卻說：「每一個人都同我講係慈父相，莫可欣係一個壞人角色，相信自己都係扮演慈父角色。」提到可欣的健康狀況，他說：「好好，君如有打畀我話小心佢有產後抑鬱，靚靚（袁詠儀）都叫我小心睇住老婆。最多佢坐月時，搵多幾個人陪佢打麻雀啦。」
禁囡囡入娛圈
方中信透露可欣應於後天出院，問他是否已註冊圓婚？他笑道：「唔結婚點做爸爸？𠵱家直情一條龍咁做啦。」他揚言最緊要女兒健康，做個正常人，不要學壞，但不贊成長大後加入娛樂圈。下午5時許他再度前往醫院。
採訪、攝影：娛樂突發組