上個禮拜喺度討論自製迷你盈富基金，早已預計敏妮blog會有一陣熱鬧，好讓敏妮喺長假期時有話題同其他朋友討論，咁多讀者留言中，最有發揮係Kenny嘅留言，佢話喺自製迷你盈富組合中，似乎太多銀行，所以提議換走恒生（011）同交行（3328），換入港鐵（066）同中電（002）。
Kenny唔知係唔係財務策劃師呢？所以投資組合要求多元化、股票相關性低，咁嘅安排好大程度可將風險分散，但Kenny唔記得咗呢個自製迷你版盈富，係模仿盈富基金而成，盈富係一隻被動式嘅交易所買賣指數基金，裏面成份股等同恒生指數成份股。睇吓恒指服務公司挑選成份股嘅準則，就知佢哋好重視股份嘅市值同成交額，入選嘅成份股必須位列上市股票總市值90%，同成交額首90%之列。
恒指非投資組合
其實，恒指成份股好大程度係反映當時香港市場同經濟潮流，好似以前恒指成份股主要「成份」都係地產股，反映地產喺當時對香港經濟佔嘅比重好大，時至今日，恒指成份股越染越多「紅色」，亦反映大陸對香港經濟嘅重要性。細心諗，恒指係一個指標，並唔係一個「投資組合」，唔想跑輸大市，跟佢買，就即係跟住市場。
至於好似Kenny咁，換入其他股份「完善」自己嘅投資組合，呢個已經變咗一個主動式基金投資組合，偏離自製盈富嘅原意，當然你嘅portfolio有機會跑贏大市，但亦會因為咁偏離恒指走勢。
順帶解釋一啲問題，有朋友提到敏妮自製嘅迷你盈富冇考慮到股息因素，其實之前只係將盈富同「自製盈富」嘅股價走勢作比較，所以冇計算股息。
自製盈富冇計股息
另外，有朋友提到「自製盈富」嘅成份股，並唔係家陣盈富嘅首15隻，主要係因為敏妮需要有一啲歷史數據先可以作比較，所以用咗今年1月2日嘅數字，當時嘅盈富成份股當然同家陣有分別，敏妮只係想show畀你睇點樣計每隻「成份股」應該揸幾多。
網誌： http://wanmanli.com/blogs/