八方噚日報道，有位協恩小六生梁皓為寫信畀煲呔，控訴特區政府冇出力幫大澳居民，搞到佢嘅爺爺、嫲嫲同一班喺大澳住嘅老人家愁困孤島，十分慘情。八方終於聯絡到呢位12歲嘅小朋友，佢同八方講，爹哋媽咪噚日入咗去大澳探爺爺、嫲嫲，爺爺個果園俾好多山泥埋住，連祖先啲骨灰甕都唔知有冇事，屋企人好擔心。
梁小妹妹話，佢今次係第一次寫信畀特首，早前校際音樂節因流感疫情腰斬，老師叫佢哋如有投訴可寫電郵畀特首；日前見父母咁擔心爺爺、嫲嫲，佢決定send封信畀特首，但至今未有回音。佢話封信完全係佢手筆兼自己打字，唔係父母替槍。煲呔前日空降大澳視察災情，但梁小妹妹認為「我覺得做得太遲。」𠵱家啲細路咁叻，過多幾年隨時月入過13萬啦。