民主黨年年都組成「民主龍舟隊」喺大埔扒龍舟，今年佢哋仲邀請到黨主席何俊仁御駕親征，擔任鼓手，令成班隊員士氣大振。據聞首次做龍舟鼓手嘅仁哥事前一次都未練過，噚日膽粗粗走上隻龍舟咚咚咚發力打鼓，真係勇氣可嘉。但有隊員笑佢份量太重，坐喺窄窄嘅鼓手位有啲「逼逼哋」，最初都要就住就住，免生意外。
罕有入到複賽
不過最令隊員爆笑嘅，係當人哋個個着住拖鞋短褲扒龍舟時，仁哥竟然着長褲同波鞋，以一身smartcausal裝束出現，同大家有啲格格不入咁囉。雖然仁哥唔啱look，但最終喺佢領航下，民主黨罕有咁入到複賽；雖然喺複賽包尾，但個個隊員都話成績已經唔錯。濕晒身嘅仁哥當然第一時間坐車飛返屋企換衫，話費事噏住噏住又病喎。
高達亦同班地區老友組咗隊「達人家族」喺西貢參賽，同樣係首次掌舵嘅高達就練咗三次咁多，可惜佢嘅努力有少少白費，事關達人家族最後都係包尾收場。雖然係咁，高達覺得雖敗猶榮，賽後仲拉隊去嘆早茶㖭。