好多人覺得喺香港過傳統節日冇乜氣氛，禮失求諸野，英國倫敦反而幾熱鬧，香港駐倫敦經貿辦贊助當地華人團體，喺泰晤士河舉行龍舟同樂日，有參加者同八方講，泰晤士河畔鑼鼓喧天，唔同國籍人士一齊扒龍舟，好玩又好氣氛，好過花成億元搞巨星匯式爛騷「宣傳」香港。
今年龍舟賽有44支隊伍參加，包括滙豐、東亞銀行、國泰等大公司，當地留學生、港大舊生會同中國大使館都有派出隊伍，華人社團、中餐館當然唔少得，有人更組成「民主龍」出賽，據聞成績唔錯，雖然無奪標，但至少無丟架，成績好過中國大使館，都算為港爭光。今年龍舟比賽同時為四川募捐，希望幫到災民。