馬主Y隻馬在沙田揚威，但唔見馬主Y拉頭馬噃，後來打電話問佢去咗邊？練馬師係唔係一早話冇機會，所以費事到場？馬主Y話：「唔係，練馬師一早話咗有機會至真，所以我本來要去沙田入場嘅，但細仔要考試，佢啲中文程度冇英文咁好，太太話點可以為咗跑馬而唔理個仔啲中文㗎，中文唔掂會影響前途，咁咪奉妻命留在家中為個仔補中文囉。我有睇電視直播賽馬㗎，我同太太見隻馬入到直路領前，嗌到好大聲㖭！」
冇法啦，這年頭，仔女考試大晒，家中節目要睇仔女考試時間表而調整。後來醒起，馬主Y兒子間學校著名巴閉，學生功課唔停，有時要阿媽阿爸加埋補習先生一齊做，抵呢間學校成績出眾，搞到學生家長趨之若鶩。
與馬主Y講完電話，碰到細路豪，問佢去邊，佢話返學校考普通話會話，於是同佢講兩句普通話，發覺佢嘅發音仲好過左丁山，𠵱家啲細路讀普通話，確比我哋一代好好多，只要佢哋學好埋英文，睇多啲陶傑學寫文章，掌握兩文三語應該不成問題，唔知點解一啲教育界人士好似好悲觀，成日話啲學生語文成績退步呢？左丁山係樂觀派，但同時認為家長要盡責任，唔好全部倚賴學校。亦唔好猛請補習教師，將責任推予他人。家長在家裏應該以身作則，多買書、睇書，多買英文雜誌，鼓勵兒女閱讀，如果佢哋唔肯睇《時代》、《經濟學人》，咁就買本People畀千金，買本NBA或足球畀公子，一齊睇，一齊討論，總有辦法吸引子女閱讀嘅，最唔好就係與子女一齊坐在電視機前睇《溏心風暴》一類肥皂劇，仔女乜都學唔到，仲驚佢哋學埋滿腦子陰謀鬥爭論㖭。
冇錢買書買雜誌，咁又點？又得啫，家長與子女可到本區圖書館借書，由淺入深，在街上攞份免費英文報紙畀仔女讀，在家睇吓免費電視英文台，晚上飯後熄電視，唔好騷擾子女溫習。子女讀書之時，自己睇報紙，睇《三國演義》或金庸小說，晚晚如是，試足一學年，如果子女語文成績仲係冇進步，先至鬧學校先生都未遲。