雖然𠵱家出街食飯乜都貴，但放咗工都會約埋幾個姊妹搵間高檔食肆食吓飯，講吓啲女同事是非，邊個男同事靚仔，減吓壓，貴啲都值得。點知早幾日嘅一次姊妹飯局，食到一肚火。
話說當晚七點幾小妹一行三人去咗灣仔莊士敦道一間樓上中高檔日本居酒屋，小妹一早訂咗位，點知上到去竟然安排我哋坐吧枱，仲要對住個洗手盆同烤爐，排排坐固然傾唔倒偈，啲廚師喺度洗手洗碗，見到都唔開胃，又驚啲水彈埋嚟。
我哋食食吓仲目擊一件惡心嘅事，見到其中一個師傅喺度燒粟米，燒到香噴噴，點知個師傅可能覺得條粟米熱得滯，見佢隨手拎咗塊布㩒住條粟米，然後用刀將粟米切開一半。唔係掛！我見佢之前攞塊布嚟抹灶頭，有冇抹地就唔知，見到咁嘅情況，我哋三姊妹即場Ｏ晒嘴，望住面前碟百幾蚊一件嘅吞拿魚腩壽司，都唔知食唔食好。
暗示有客快埋單
冇晒胃口唔在講，最搞笑係我哋都未埋單，侍應就攞張單嚟叫我哋找數，又用眼望一望門口等位人龍，暗示有客叫我哋走。吓，今時今日仲係咁嘅服務態度，啲嘢仲唔係平，小妹以後都唔會再幫趁。
電郵：mailto:[email protected]
逢周六、周日刊出