𡃁界女神JaniceMan（文詠珊）日前語出驚人用「上天懲罰」嚟形容四川大地震，事後引嚟網民大肆抨擊，嚇到佢急急出嚟補鑊，兩番公開道歉認錯，不過一向以鬧人博出位嘅Freeze，噚日就繼續咬住JaniceMan唔放，仲指摘佢嘅言論係唔值得原諒同埋話JaniceMan份人好蠢。
冇收酬勞
JaniceMan同Freeze噚日分別到尖沙嘴出席「香港遊戲界賑災大行動」，佢哋一先一後到達現場，所以冇正面碰頭。率先到場嘅JaniceMan就自爆冇收取任何酬勞特登嚟支持活動，佢話：「我話過會用實際行動出力賑災，總之會盡我嘅所能而我又覺得OK，為咗做善事，我唔怕着泳裝影寫真。」
雖然JaniceMan希望大家畀機會佢，不過之後到場嘅Freeze就踩多佢兩腳，成員石詠莉先炮轟話：「講錯呢啲嘢，簡直唔可以原諒，莎朗史東（SharonStone）之前承認講錯嘢，佢（JaniceMan）仲重複講，真係好蠢，要學精啲！」甄穎珊仲抵死咁話：「我已經夠蠢，佢仲蠢過我！」陳樂榣就話：「佢經驗淺，以前我都講錯嘢，但新人要吸收多啲經驗同說話技巧，希望佢吸取到教訓啦。」
扮彭美拉
此外，甄穎珊噚日去旺角宣傳新片《超低能特攻隊》，她以戲中彭美拉嘅性感造型喺旺角鬧巿派發禮品，其間更有巿民圍觀同索取簽名，甄穎珊表示，佢喺幾年前亦係由角色扮演入行，所以好有經驗。