被自由黨田少寸平日只負責影印、斟茶遞水嘅特首辦特別助理兼民記黨員陳克勤，原來早已唔聲唔聲，喺上月2號以「個人理由」炒煲呔魷魚，歸隊民建聯備戰出選。民建聯主席譚耀宗噚日話，陳克勤遞咗辭職信後通知佢唔撈，又透露陳克勤好有興趣喺新界東出選，因為佢喺沙田起家，衣錦榮歸最好。
八方收到風，陳克勤好快就會正式落區視察，有個電視台月內會舉辦選舉前哨戰節目，擬邀請新界東幾個政壇新面孔亮相，包括公民黨曾國豐同自由黨簡永輝，陳克勤都表示有興趣。
民建聯近年厚愛新秀，上屆搭順風車當選嘅李國英，相信都係時候落車。其實劉江華湊大嘅公民力量都新秀輩出，點解劉生唔喺當中揀蟀呢？