到馬場最容易碰到一啲大人物，特別係到沙田馬場七樓（遴選會員與董事廂房）及六樓（馬主廂房）走一個圈，隨時會見到唔少政界商界名人。六月一日沙田馬場有十八區盃，十八區區議會主席與區議員大都往馬場一行，更加容易搵到名人傾幾句。
在馬會會所嗰邊，就碰到政壇元老，講兩句馬就話題一轉，去咗副局長、政治助理風波。元老話呢啲事明明係無風起浪，特區政府只要一早處理得宜，自動公開宣佈各人薪酬及護照，傳媒就冇乜法子炒作，何解政府堅決保持不公開，不透明，畀機會傳媒逐日逐步進逼，搞出個大頭佛，元老想極都唔明，只能贊同王永平與陳祖澤所講，stupid，元老加多一句：「唔知係唔係鬼拍後尾枕，喺立法會選舉年放生泛民主派呢！」
咦，泛民派本來處於劣勢，苦無選舉話題，如劉兆佳大教授所言，香港人鍾意講銀，碰上今年好景，人工有得加，公僕更加加到笑，而曾俊華司長又識得派糖，睇怕民主派今年九月選舉，有輸冇贏啦。哈，點知曾班子賜予良機，泛民仲唔咬住副局長、政治助理不放咩，出完一招又一招，最好嘈到選舉為止。
咁嘈法，對泛民有冇好處呀？元老話：「此事提醒香港選民，權力要有制衡，唔可以畀當權者與保皇派在立法會掌握絕對控制，否則當權者可以任意施為。香港市民好精嘅，佢哋未必鍾意泛民主派啲經濟政策，但亦會投泛民一票，目的就係希望有一班人坐在立法會做吓反對派。長毛都係因為咁先至入到立法會嘅啫。」
元老嘅觀察啱，還是劉大教授嘅觀察啱，九月自有分曉。資深記者L來報，話西環嘅選舉目標係令到泛民議席少於二十席，趁住經濟好與奧運年嘅愛國情緒，打到泛民潰不成軍，方便政改方案出籠。記者L話呢個算盤在未有副局長事件之前，打得幾響，但如果考慮埋元老所講嘅鬼拍後尾枕效果，又可能不是那麼容易。