川崎前鋒射手祖尼奴早前申請歸化入籍。呢位上季日聯神射手，03年由巴西彭美拉斯加盟，當時川崎只係乙組球隊，但佢嘅速度同個人技術出神入化，首季已射入28球，名列射手榜次席，令祖尼奴在日本聲名大噪！
未到過歐洲搵食嘅祖尼奴，近年獲多間歐洲球會垂青，當中包括西班牙球會貝廸斯斟介，不過祖尼奴決定留喺日本發展：「我同家人都好鍾意日本，呢度所有人都好友善，足球制度亦好健全，所以決定留低。」
效力前鋒5季入123球
祖尼奴效力前鋒第2個球季，以37球成為日乙神射手，更帶領球隊升上05年展開日職聯賽，即使前鋒踢法較注重防守，但祖尼奴依然憑一己之力摧毀對手。雖然有人曾經質疑，祖尼奴升上日職聯後，能否繼續保持水準，但祖尼奴之後兩個球季，分別射入16球及20球，上季更以22球成為日職聯神射手，向外界證明自己實力。
日本法例規定住滿5年便可申請入籍，祖尼奴亦希望取得日本護照，代表日本國家隊出戰。不過，目前仍有兩個問題要解決，首先係祖尼奴曾於96年入選巴西20歲以下國家隊，轉變國籍要國際足協審批。另一問題係祖尼奴入籍前，必須通過日語測試，所以祖尼奴除咗要練波之外，仲要努力溫書，呢排認真唔得閒。祝你好運啦！
作者簡介：2001年開始擔任足球賽事自由撰稿人，曾親身採訪各項大賽，包括世界盃、亞洲盃及非洲國家盃等。現為香港賽馬會足智彩網頁撰寫球評分析。