前高官羅范家族熱心教育，佢大佬、行會成員范鴻齡夫婦噚日捐出340萬元畀母校九龍聖芳濟書院，令學校個「聖芳濟書院基金」成功邁向1,000萬元目標。大學籌款隨時以億元計，中學搵到成千萬元可謂十分成功，范鴻齡鼓勵基金會要「放膽」動用基金，盡量幫助有需要學生，更拍心口保證，如果學校日後再有需要，佢會繼續支持。
范鴻齡1964年喺聖芳濟畢業，佢自言中學時成績平平，不過校長Bro.Kenny好錫佢，當佢親生仔咁好，兩「父子」經常去界限街花墟球場睇波，至今佢仍然十分懷念返學日子。聖芳濟創校逾半世紀，名人校友包括李小龍、許冠傑、郭家明、陳志雲等，籌款所得用於改善校內設施同增聘英文科教師，亦會喺低年級英文科目推行小班教學。