作為日本Kawasaki車系旗艦級嘅VN2000，不可沒一套頂級電鍍品壓場。醒目頭燈配粗壯把手，以大量電鍍材料粉飾全車各個部份，即使油缸上嘅淚滴形電鍍徽章，手工表現都一絲不苟，盡現誘人本領。不過，在這華麗嘅面相下，卻隱藏了狂暴本性，一旦引擎踏入3,000rpm，峯值扭力有如泉湧。別忘了佢名字係Vulcan，怎可負了羅馬火神之名？
記者：Monaco
攝影：楊錦文
模特兒：Jenny、Kimmy
動靜顯功架
美式巡航車一向追求者眾，馬力競賽唔係佢哋嘅強項，但專注於低轉扭力。佢哋之所以令人着迷，全因霸氣、力量與虛榮作祟！Vulcan2000本住以上長距離巡航車嘅不二法門，長陣軸距，加上大量BlinkBlink精緻電鍍。插入車匙一刻，扭動嘅唔只係車匙，而係加上匙膽嘅旋鈕，細緻嘅執着在這一環充份表現出來，扭油震撼一刻，最叫人窩心。當火神大燈亮起，隨之而起係嗰台2.0公升V2引擎嘅咆哮，半風冷半水冷嘅V2引擎躍躍欲動，V形汽缸爆發力傳上主軸，化成沉厚低轉扭力。充沛中轉域加速，直路巡航穩定，駕駛舒適。手握曲張巨型把手，有稱心平衡感，感受四周注目禮。大型腳踏板加前後踢變速桿，拖波時猛踩腳踏，如策馬般型仔。即使靜止，其碩大無朋嘅身形，已經可以吸引不少目光，叫人駐足留意。
美式巡航標記
火神喜愛蹂躪那條公路？似乎係未知之數，只知直至目前為止，火神車系已經肆虐接近30個年頭，痛擊一眾歐美對手。引擎發展成熟，平衡軸利用齒輪驅動，曲軸設計亦大大降低行車震盪。引擎附有ECU系統，負責監控燃油噴注系統，雙電噴嘴配合金火嘴，令引擎喺不同轉數皆有敏銳嘅油門反應。經典外觀，有先進科技有內涵。
另外，佢亦配置咗自動怠速系統，即使天冷着車亦毋須拉開風門，油門提供全天候暢順運作。打理電鍍部份已叫人花心機，皮帶傳動省掉了保養煩惱，沒有直軸嘅重量，亦沒有鏈嘅麻煩。半風冷式設計散熱，化解全水冷要克服嘅重量問題，大大減輕火神重磅嘅煩惱。唯一要挑剔係半風冷式散熱設計，死忠於美式巡航，力挺風冷至上。但是V形風冷震盪嘅粗獷，VN2000就沒有嗎？
規格
引擎：2,053c.c.水冷式4衝程V形雙汽缸SOHC
馬力：94ps/4,400rpm
扭力：19.5kgm/3,000rpm
傳動：5前速手動，皮帶傳動
車輛提供：泰力摩托車中心（25122228）