花旗股市前晚好醒神，大幅反彈收市，不過投資者嘅信心其實唔係好夠，因為家吓全個世界好似立立亂咁。
花旗嗰邊無乜邊瓣掂，股市唔得、樓市唔得、美元都唔得，𠵱家仲話要留意長期通脹預期上升，仲有就係銀行要撲水加資本，聯儲局仲入埋去雷曼兄弟嘅office睇實，之後隨時又會有好大煲嘅消息，幾乎講漏咗，前晚花旗兩大債保公司又俾評級機構下調評級，油價大幅反彈，跟住會點？越諗越驚。
亞洲呢邊又點？𠵱家講緊加息潮，仲有就係越南爆煲，會唔會火燒連環船呢？好難講，因為喺全球一體化之下，每個國家都好難獨善其身。大家呢一刻唔需要太擔心，但做好兩手準備，同埋密切留意事態發展，就係必須要做嘅嘢。
港股昨日升146點，成交太奀，真係冇乜用，再咁落去，港股好難避免一次大力啲嘅下挫。
中鐵建C輪7467：中鐵建（1186）昨收12.56元，如果升破13.20元睇14元，可以諗吓隻中鐵建C輪7467，隻輪昨收14.3仙，槓桿率8.8倍（有效5倍），正股升上14元，7467應該唔會低過23仙，有成65%升幅，正股50日線喺12元左右，如果跌穿呢條線，就沽咗隻輪止蝕。