民建聯立法會議員曾鈺成、九龍城區議員梁英標愛民邨辦事處，噚日朝早8點幾發生刑毀案件，兩人辦事處俾人淋白漆。毗鄰嘅民主黨議員涂謹申、陳麗君辦事處門口，竟然有兩個漆油空罐。
曾鈺成議員助理吳奮金話，早前辦事處裝修，將部份枱凳搬出門外，點知遭鄰居陳麗君辦事處職員指阻礙公眾地方；近日輪到民主黨裝修，裝修工具就隨便擺喺門外，有人明顯有口話人，無口話自己。
陳麗君則指，辦事處裝修快埋尾，工人暫放工具喺門外，佢都管唔到，至於現場兩個疑似涉案嘅油漆罐，估計係裝修師傅留低，民建聯唔好入埋民主黨數，「邊個議員違規，房署接到投訴自然會處理。」梁英標就比較公道，佢話可能係無聊青少年貪玩，冇乜財物損失，只係整污糟地方，算佢哋唔好彩啦。