財技出神入化嘅小小超李澤楷，出手收購買嘢冇失手而回，除咗早前競投火炬，以10萬元之差輸畀林大輝飲恨而回，八方早就話火炬拍賣陸續有來，小小超大把機會摘炬而回。
國泰航空常務總裁史樂山上月喺寧波傳聖火，佢近日決定將火炬捐出義賣，籌款協助四川災民，佢更話今次以配對形式拍賣，即係善長出幾多錢競投，佢一對一捐出同等金額，希望幫到更多災民。
拍賣透過商台節目《左右大局》進行，噚日正式開始，競投為期一星期，下星期五截止，上次失手嘅小小超今次唔好走雞嘞。做善事唔好禮讓，如果大家都想買番支火炬留念，又想協助災民，都可以參與競投，詳情可瀏覽商台網頁。