距離北京奧運尚有兩個月，即時殺到埋身的則是瘋魔無數球迷的歐洲國家盃。近日本欄不時話對6月份港股表現有保留，除了認為股海本身氣氛麻麻，另一原因則係冇乜股票好炒，收市競價時段又被大戶玩晒；湊巧遇着歐洲國家盃盛事，相信唔少投資者可能顧住睇波，炒股就更加無心戀戰。
星俠本身係標準球迷，今個月肯定會捱眼瞓睇波。每逢有世界級足球盛事展開，球衣都會熱賣，其中永嘉集團（3322）位於旺角的足球概念店「FutbolTrend」更是球迷朝聖地之一。
PE6倍吸引
永嘉業務集中三部份，包括以OEM形式為國際運動品牌生產運動服裝、運動服分銷及零售，以及向歐美百貨店提供貨品及採購服務。集團07年純利上升11%至2.9億元，現價PE約6倍，相較其他運動服裝股有一定吸引力。該股上月中由1.3元彈上1.59元後，股價目前在1.4元之間上落，可能趁歐洲國家盃氣氛炒一轉，不妨留意及小注跟進。如後市能升破1.59元阻力，上望1.9元，跌穿1.2元止蝕。