《信報》執行董事曹仁超個長壽專欄「投資者日記」可以話係該報金漆招牌之一，同老闆林行止個專欄齊名，小小超李澤楷買起《信報》，據講要兩位「鎮報之寶」繼續執筆保證收視。《南早》財經專欄「利是」噚日指曹sir同小小超簽嘅約今年9月屆滿，曹sir功成身退會退休。
「有好多嘢醞釀緊」
《信報》中人話畀八方聽，曹sir的確9月就約滿，不過去向未定，「有好多嘢醞釀緊」。據講佢可能繼續做執董，亦可能退出管理層只寫專欄，知情人士指曹sir雖然退休，但相信唔會隨便封筆，因為佢自己好反對退休後無所事事，認為有工作寄託對維持健康好重要。唔寫日記，可以改寫周記，最後如何安排，八方套用曹sir名言：木宰羊。
股市暢旺，市場渴求有料到股評專家，曹sir近年頻頻曝光，甚至同詹瑞文拍檔登台，有傳唔少投資大行打佢主意，酬勞從優，不過曹sir不為所動，佢話自己成世人都係寫錢銀嘢，退休後只想安安樂樂，唔再一味講錢，希望未來20年使盡過去40年搵到嘅錢，唔係嘆世界，而係做善事，最想改善內地農村教育，讓農民憑知識改變命運。