大馬主請紐西蘭種馬牧場（studfarm）主人食午飯，席設美國會所西餐廳私人房，從交易廣場四十八樓望過去西九龍，一目瞭然，適值中午陽光普照，嘉賓Ｓ爵士不禁讚嘆一聲：Whatagreatview!左丁山有同感，美景當前，和牛在餐碟中，講養馬、配種及名種血統，何其寫意也，左丁山幾乎忘記咗四十八層樓下嘅凡間實況。
可惜呢，大馬主好快就將我哋帶回現實，佢話最近到U.Penn參加女兒畢業禮，聽紐約市長彭博在畢業禮上致詞，跟住到紐約打個轉，發覺佢幾位投資銀行家朋友已經失咗蹤，律師、核數師開始驚住冇工做。目前信貸市場緊縮，IPO冇大水喉支持，併購活動幾乎亁涸，所以投資銀行裁人不絕，而專做法律顧問，專職審查顧問嘅律師、會計師行亦開始叫人放假，遲啲怕會炒人㖭。大馬主話華爾街衰退已成事實，雖然股市與統計數據未曾反映得到，大家千祈唔好唔信。經濟衰退會有利於民主黨及奧巴馬，假如奧巴馬順利進入白宮，佢會奉行保護主義，抗拒自由貿易、亞洲國家冇啖好食。
奧巴馬已經擊敗希拉莉，如果希拉莉心有不甘，退出民主黨，以獨立人士資格參選嘅話，共和黨麥凱因就有機會嘞。席中紐西蘭大馬主Ｃ話：「未必冇可能㗎，克林頓夫婦兩人，素來唔知個輸字點寫，希拉莉一味負隅反抗，爭到底，輸咗之後一怒退黨，冇人阻止得佢。如果希拉莉顧全大局嘅話，一早退選啦。講開又講，我曾與克林頓同機，發覺呢個人叻到不得了。」之不過，克林頓與希拉莉係徹頭徹尾政治動物，與其做民主黨罪人，希拉莉實會爭取做奧巴馬副手，爭取分權。
原來大馬主Ｃ去年從紐約乘機往三藩市，只得佢一個人坐在頭等艙，飛機就快起飛，即將關閉艙門之際，成隊人衝入嚟，坐在頭等艙，呢批人竟然就係克林頓與特工保鑣。馬主Ｃ幾乎嚇親，定神之後，與克林頓打招呼，想唔到克仔好好傾，打開話匣，同馬主Ｃ傾足四個鐘頭，天下大事無所不談，但當然全無機密啦，一直至落機為至，仲順手在馬主Ｃ本書簽名留念（按：西人坐飛機多數揸住一本書嚟睇）。馬主Ｃ到咗三藩市之後，同朋友講起，朋友話：「你認真行運，我哋美國人要坐在克林頓身旁，起碼要使十萬美元！」