無綫劇集《真心英雄》日前在西貢拍攝燒烤煞科戲，劇中演員齊齊出動。不用埋位時，蒙嘉慧努力為其他演員燒烤食物，又有說有笑，還跟劇中一男一女小演員嬉戲，以行動澄清早前有雜誌指她扮大牌和不喜歡小孩子的報道。
蒙嘉慧、郭晉安、梁靖琪（Toby）和鄧健泓等一班無綫新劇《真心英雄》演員，日前齊集西貢一郊野公園，拍攝燒烤煞科戲。為了拍攝這場戲，劇務準備大量燒烤食品和零食，各演員因利乘便趁等埋位享用美食，其中蒙嘉慧除了教兩名小演員燒棉花糖外，更烤了不少香腸分發給其他演員和工作人員，甚得人心，並不如早前雜誌指她扮大牌致神憎鬼厭。
「你哋唔好激姐姐」
蒙嘉慧更半自嘲地跟小演員說：「你哋唔好激姐姐呀，一陣又話我唔鍾意細路仔呀。」她又笑言演郭晉安兒子的小演員譚真一非常饞嘴，故此要特別照顧他，她說：「阿一哥真係好食得，試過啲道具食物未正式拍已經俾佢食晒。」她又說：「次次拍親同類戲，啲食物都食唔晒，所以今次同工作人員講明買啲乜嘢，可以一路拍一路燒，唔會浪費。」
剛為人父的安仔說：「呢場戲講大家聚首一堂，準備第時拍續集容易交代。」對於劇中兒子一哥活潑好動，安仔說：「細路仔活潑啲好，我都寧願囝囝第時反斗啲，好過太靜。拍完套劇都會休息兩個月陪囝囝，驚佢唔認得我。」
安仔透露早前有段時間沒有跟兒子接觸，當抱起他時，兒子心跳加速以為他是陌生人，故安仔決定多花時間在兒子身上。
Toby喜師奶發威
此外，Toby原來在《師奶股神》中跟一哥演母子，她說：「最辛苦係要抱佢，佢成45磅真係好重，好在𠵱家收視唔錯，可以唔使成日俾人話整跌啲收視。」
採訪、攝影：何永寧