呢排有位blogger成日講最新AV產品，好似叫AV男優，sorry係AV藍。小妹對新產品尤其手機都好有興趣，希望佢都推介吓啦。大家可能都知，有時攞手機去維修，手機公司會順便更新手機軟件，我個friend最近更新咗諾基亞N82手機軟件後有「新發現」。
「短訊傳神啲」
佢話，𠵱家喺部手機用筆畫輸入法，例如輸入「25112511234」按鍵，就可以出到廣東粗口字：「以前唔得㗎，𠵱家幾乎所有粗口字都好易打到，唔知係咪科技先進，畀大家用手機打粗口短訊，傳神啲呢！」吓？我黃花閨女點答喎，試過用自己部N6300打唔到粗口字，但其他同事用N80、N72都打到。
終於忍唔住打電話去諾基亞問，對方回應手機內所有中文字都嚟自政府編製嘅《香港增補字符集》，字庫內有超過幾千字，要視乎不同手機記憶體大細，先決定會唔會加入部機度，所以有啲手機有、有啲冇，或者更新軟件後會加埋。政府資料顯示，收錄嗰啲字主要係方便司法機構記錄審訊過程，同埋執法機關錄口供嘅。加呢類字，對我嚟講冇用喎，我都唔講粗口……同大話嘅。
電郵：mailto:[email protected]
逢周六、周日刊出