下周二（6月10日）是Beyond已故主音黃家駒生忌，屆時成員葉世榮將與關係破冰的黃家強和黃貫中同台合唱家駒名曲《海闊天空》，在這極具紀念時刻上演前，日前世榮卻透露其紅白二事。曾先後經歷家駒和未婚妻離世的他原來於年初喪父，雖然人生無常，但他還是要走出陰霾，宣佈明年迎娶拍拖兩年的圈外女友，重過新生。
本地搖滾勁旅Beyond將於下周二上演世紀時刻，當日是黃家駒生忌，也為紀念他離世15周年，三年未曾同台亮相的成員葉世榮、黃貫中（Paul）和黃家強，該晚均會出席會展舉行的「別了家駒十五載海闊天空音樂會」，據知他們將合唱家駒名曲《海闊天空》，世榮更會見證屢傳不和的家強和Paul融冰。
年初喪父
今次的紀念家駒音樂會，令三子難得聚頭，近年長駐內地發展的世榮也專程出席，日前他接受本報專訪時，才透露今年初喪父，但其心情已平復下來，世榮說：「最近我阿爸都走咗，係今年年頭嘅事，不過佢年紀大，70幾歲，我見到佢善終都安慰。人係咁㗎啦，從起步到停步，係有好多唔同經歷，正常嘅，睇你放唔放得低、執唔執着㗎啫。」
44歲的世榮先後經歷過父親、拍檔家駒和未婚妻許韻珊（Cynthia）三位至親離世的切膚之痛，篤信佛學的他揚言已參透生死：「我一早睇化人嘅生死，當你睇化時就唔會有煩惱。」
雖然家有白事，但世榮的人生路還是要繼續，他與圈外女友Faye拍拖兩年，感情穩定，已計劃明年拉埋天窗兼盡快造人，世榮說：「大家都成熟，結婚都相距不遠，有咁嘅打算，都想訂婚先，要有行動啦，呢個都拍咗兩年，一切都係睇緣份，緣份嚟嘅時候，你點走都走唔甩，但最快都要出年，結婚要諗好多嘢，成家立室喎，要睇點樣安排自己嘅工作時間，點樣照顧屋企人，用最大槓桿、最高效率嘅工作方式，將來有咗細路仔就更加啦，我哋都諗住要小朋友嘅。」
擺酒宴客
世榮又笑說：「原先大家冇諗住咁遠，但相處耐咗感情穩定，希望大家建立一啲嘢，建立成功嘅時候就係美滿人生路，大家有默契咁啦。」世榮稱他會擺酒宴請親朋，但擔心掛萬漏一，故也大感頭痛。
世榮與前女友Cynthia曾拍拖8年，02年10月她被發現倒斃家中浴缸，女友猝死令世榮傷心欲絕，六年後他終可走出陰霾，告別單身，展開人生新一章。
採訪：朱倬誼
