前排Toyota代理引入新一代Alphard350，車未嚟定單已過600部，氣勢一時無兩，繼續走其MPV王者之路。要同佢抗衡，水貨惟有搵嚟跟Alphard同一血統嘅Vellfire嚟一次兄弟較量。同廠同偈規格一樣，不過Vellfire有全車包圍，加埋頭尾燈設計更Sporty，而且有更多車身顏色選擇兼有齊Option料，形象更後生！
撰文：嘴嚼爺
攝影：譚盈傑
Model：Carol
既然Alphard嚟緊都有頭燈尾燈鬼面面罩唔同嘅Sporty版，我唔明點解日本Toyota要用Vellfire同Alphard兩個名嚟分開兩款車，不過唔明歸唔明，多個選擇都好嘅。喺日本，同級嘅Alphard同Vellfire性能規格基本上完全一樣，但拼埋本地行貨規格一比，就會發現日本版馬力多6匹，扭力多0.5kgm，雖然揸落或坐落未必發現有差別，但得個知字都係消費者權利。未必個個買Vellfire都有司機，所以都唔可以忽略佢嘅駕駛樂趣。
齊色齊款有得揀
討論性能之前，我想講講個人經驗。其實我，尤其深夜時分，喺公路上周不時被Alphard𠝹，車大氣流勁，每次佢「蓬」一聲殺過，我部電單車仔都會「妖」一聲作回應，大牛龜！今次試車得出嘅結論，以Alphard好少機會坐爆7個人嚟講，280匹馬力其實好飛有餘。試車時我唔太熟路都成日唔覺意踩快咗，何況班日日車老細熟晒路嘅職業司機？別怪他……別怪他。未上車前，我企喺告士打道短短10分鐘，已經閒閒哋見到最少7部Alphard經過，其間仲有一個老細型物體趕住落訂買Vellfire，睇嚟無論新款Alphard定還是Vellfire，都會一街都係，所以顏色同個人化嘅選擇好重要。代理Alphard暫時只有黑白銀3色，但Vellfire就有齊白銀灰黑金紫藍7隻色揀。好似今日試呢隻紫色，我就覺得低調得嚟又幾有格調，而且前後頭燈都上下間開，鬼面罩亦稍稍惡形惡相，加埋全車包圍，比起Alphard多啲活力同年輕感覺。另外，只要上一上日本嘅官網，就會發現Vellfire有好多Option料等你揀，霧燈鬼面罩都充滿改裝潛力。內櫳格局方面，同樣都有選擇，當然可以配呢期Alphard響晒朵嘅中排Ottoman座椅，不過若果唔想坐商務而想坐經濟客位，都有手動座椅選擇。另外，仲有2.4公升7前速版本又有8座位版本，可以睇定嚟揀。
隱形富豪無電椅
你可能會話，邊有人咁笨有商務唔坐坐經濟㗎？又唔笨得晒喎，因為手動座椅都有佢嘅好處。首先，如果你唔係情迷變形金剛，日日將部車內櫳變床、收起拉前推後的話，唔會麻煩得去邊，而手動版座椅亦細張啲，撞啱如Model般細粒身形嘅乘客，手枕腳枕位會更啱位更舒服。換個極端，遇到大肥貓身形乘客時，兩邊手枕又可以收起，唔使兩邊局住逼，而且呢款座椅可以比Ottoman大班椅推得更後，讓中排乘客坐得更鬆動。今日試呢架係手動絲絨座椅版本，其他設備如天花LED燈、獨立冷氣、雙電趟門都同樣有齊，只係內櫳冇咁誇張地奢華，香港咁多隱形富豪，咪啱囉。又或者你只係想當佢係一架家庭車，都可以唔使去得咁盡。
規格
引擎：3,456c.c.V6DOHC
馬力：280ps/6,200rpm
扭力：35.1kgm/4,700rpm
傳動：6前速+/-半自動波，前輪驅動
尺碼：4,865×1,840×1,900mm
軸距：2,950mm
車重：1,400kg
車輛提供：富利堡汽車（28776700）
