香港醫學會兩年一度轉莊，前日新一屆會長、會董選舉提名結束，一如所料只有一個人角逐會長職位，就係有醫學界「鴻興大佬」之稱嘅謝鴻興醫生，由於冇其他人參選，佢喺冇對手下成為醫學會新任揸fit人。
謝鴻興喺行內以敢言見稱，作風夠薑言詞辛辣，05年老董落台，煲呔爭取醫學會提名參加補選，謝鴻興唔賣佢賬，表示寧願提名李永達都唔支持煲呔，「有個乞兒已經乞到好多錢，就唔使再畀錢佢啦，佢夠食咪得囉。」
當日佢呢番「乞兒論」引起好大反響，八方聽聞唔少醫生聽到後笑到碌地。港大醫學院「賣」命名權畀捐款富豪李超人，謝鴻興直斥大學「財迷心竅，見利忘義」，勁寸校長、教授，「以前啲敗家仔，最多都係敗晒份身家，唔會敗埋個神主牌。」
就係呢種把口唔收百無禁忌作風，謝鴻興令行家對佢另眼相看，其提名人、醫學會會長蔡堅話想交棒畀佢，就係貪佢夠惡死。謝鴻興同八方講，上任後會盡力反映醫生對醫療融資諮詢文件嘅睇法，又會要求政府規管醫療集團同唔好增加醫科生學額。
史泰祖俾人勸退選
近年醫學會會長選舉時有競爭，早前有傳皮膚科醫生史泰祖躍躍欲試。佢近年喺政治上幾活躍，致力搞智庫，又挺葉劉參選，史泰祖最終冇入閘，八方到收風係因為俾人勸退，因為佢支持政府醫療融資諮詢文件，如果參選可能俾反對嘅醫生狂插，客觀形勢擺在眼前，抽身而起好過做炮灰。
醫學界人士同八方分析，史泰祖近年擔任多項政府公職，被視為已「歸邊」分子，醫學會會董對此好有戒心，由成日批評政府嘅謝鴻興做揸fit人，大家個心安樂啲；亦有醫生指史泰祖似乎已選擇走入建制，做會長反而縛手縛腳，事實上今屆佢連會董都唔做，輕身上路。
謝鴻興咁夠薑，未來兩年醫學會會唔會變得好激呢？有會董話唔會，因為大部份醫生都係保守嘅人，個會唔可以脫離群眾；另一個問題係對9月立法會選舉有乜影響，有人指對郭家麒有利，因為佢同謝鴻興關係好，不過公立醫院醫生人多勢眾，郭家麒冇十足贏面。
mailto:[email protected]