蔡少芬、吳鎮宇及朱茵的經理人陳美玲，有傳近日患上重病，未能再為旗下藝人擔任經理人工作，據知陳美玲待其他藝人約滿後便減少工作量，全心全意養病，而蔡少芬前晚出席新戲慰勞宴時坦白承認剛巧和經理人約滿，暫時會由自己接洽工作，學習照顧自己。
蔡少芬（Ada）的經理人陳美玲（Helen）近日傳患上重病，不能再擔任經理人工作，甚至乎有傳Helen的公司會於本月底結業。前晚於佐敦出席新戲《同門》煞科慰勞宴，Ada坦認經理人患病，她說：「我唔想Helen再咁辛苦，加上咁啱我又約滿，所以我唔同佢續約，自己接工作，趁機會好好學習照顧自己。」
屬同一公司的吳鎮宇，被問到其經理人的公司是否本月底結業？他昨日在電話中說：「幾個月前Helen有病，身體已經透支，無謂連荷包都透支，佢身體唔好，要減輕工作量。我識咗佢十幾年，唔知同佢仲有冇約。」至於Helen患上甚麼病？吳鎮宇表示：「女性病，唔識喎，咁多年都要唞唞啦，佢做唔做都對我冇影響，因為我自己都減產。」該公司員工透露公司會如常運作，但會減少人手，據知部份員工已開始搵工。
慰勞宴齊飲苦茶
至於《同門》慰勞宴上，蔡少芬、江若琳（Elanne）及余文樂等一同飲苦茶和食甘草欖，寓意「甘苦與共」。Elanne在戲中角色的駕駛技術出神入化，但現實之中她仍未考取車牌，她說：「心目中想買10多萬嘅日本車，再將佢噴成粉紅色同埋喺車頭鑲閃石。」她還希望投到英文名字縮寫和生日的車牌，即是「EK930」。
昨日江若琳到商台接受訪問，她表示日前在旺角紅燈區拍外景，當日演出有余文樂、田蕊妮及官恩娜外，還有近30至40名臨時演員扮演黑社會成員，怎料拍攝中途竟遇到真的黑幫人士要求收陀地費，余文樂即刻叫女演員上車避一避，結果那場戲最終都未能完成。
採訪、攝影：林妃、何永寧、王連連
