呢排香港眼紅症流行，慎防傳染，年青人更加唔好習染到，以免成世人都唔快樂。
學生Y考完高考，等六月尾放榜，已經話第二日如果未夠三十歲，就已經月入十三萬元，唔知點算好，啲錢點樣去用呀，左丁山唯有對佢講：「人比人，比死人，人哋廿八歲可以月入十三萬，你千祈唔好羨慕或妒忌，以平常心視之可也。」不過報紙大力渲染，又出到評論單打一位二十八歲年青人，學生Y嘅思想點都有啲受影響，唯有向佢做番一啲腦袋清潔工夫。並舉學生Y嘅表姐B為例子。表姐B自美國一流名校經濟系畢業，唔到華爾街搵工，情願走返嚟香港。卒之做咗一本英文雜誌嘅所謂staffwriter，日日工作十二小時起碼，但非常鍾意噃，睇佢寫本地古老建築文物，文筆好到極，但人工有幾多呀？表姐B做一年，唔夠二十八歲政治助理做一個月。如果夾硬要比較，學生Y嘅表姐B咪要大喊三聲？人各有志吖嘛，千祈唔好同人比較。
如果要批評，就應該響當初批評政治助理呢類工種唔應該有十萬至十六萬月薪，比初入職政務官高三倍。其實月薪四萬至六萬已經差唔多，因為政治助理既係以培養政治人才為目的，以年青人為招攬對象，二十五歲至三十五歲最啱，過咗就係超齡，使乜以十萬月薪以上嚟招聘呀？既然傳媒與議員無留意此點，立法會順利通過咗，𠵱家先至發馬後炮話政治助理人工太高，特別針對一位二十八歲嘅陳智遠，左丁山覺得十分唔公道，尤其是一啲評論，有歧視年青人之嫌，亦似係主筆/編輯吃咗酸葡萄。
時裝大師聖羅蘭逝世，時裝界一片哀悼之聲。聖羅蘭享壽七十一歲，五十年前只係二十一歲仔，就在巴黎一炮而紅，成為設計大師狄奧（ChristianDior）嘅繼承人，受巴黎時裝界讚揚，冇人鬧佢年青得滯。陳智遠當然今天不知是龍是蛇，日後自有分曉，因政治助理嘅編制，睇佢坐享高薪，與退休警官盧奕基相同，呢幾日受盡冷嘲熱諷，可以講係佢從政第一課，頂得住，日後有前途，過唔到關嘅話，快快趣趣讀個博士學位，返回大學教書算數。