啱啱去完芬蘭取經嘅教育局局長孫明揚，噚日同八方講起此行見聞，佢好坦白咁講，花咁多錢去北歐考察多日卻收穫甚少，因為北歐國家同香港文化大異，冇乜嘢可以供香港借鏡，唯一令佢印象較深刻係，當地人英文十分好，然而芬蘭母語、官方語言都唔係英語，觀察幾日，終於恍然大悟。
原來芬蘭電視台節目製作水平係有限公司，幾乎所有節目都係外購，內容全部都係講英文，又冇配音，全民焗睇英文節目，耳濡目染英文自然好，而且喺芬蘭當老師都係碩士，讀完本科再讀教育先可以入行，知識比較廣闊，呢方面香港暫時未做得到，要播多啲英文節目，亦唔到教育局話事，所以孫公話此行得個睇字。