我車報員除咗會睇實香港車壇，八吓有咩新料可以報畀大家聽之外，就連外國嘅News都會照樣八畀大家聽。就好似上月中先曝光嘅LifeBallMINI2008咁，會由即日起至6月15日喺網上進行慈善拍賣，以進行協助愛滋病患者嘅工作。
呢部LifeBallMINI2008特別版，其實係由新款MINIClubman改裝而成，並喺5月17日由英國著名服裝品牌AgentProvocateur創辦人JosephCorre，親自揸住佢走過維也納大會堂前嘅紅地毯，喺4萬名賓客面前首度亮相。要將一部MINIClubman變身成LifeBallMINI2008特別版，下嘅工夫確係多不勝數，先要將車身噴上全黑色，並噴上粉紅色「腰帶」及POLICE字樣，加埋黑色同粉紅色格仔車頂、粉紅色警示閃燈，務求令造型同舊式英國警車無異。車廂內部亦變成格仔天下，無論係前座還是後排分隔墊，都係用格仔皮鑲嵌，而後方嘅車窗更全部加有欄柵，營造出一個流動監倉嘅氣氛。
呢部LifeBallMINI2008特別版，將會由即日起至6月15日於www.ebay.at進行慈善拍賣，所籌得嘅款項將會捐贈予美國嘅amfAR基金同其他援助愛滋病病人嘅組織，以協助減少愛滋病喺全世界擴散嘅機會。咦，唔知香港班Fans又會唔會Bid埋一份呢？但部車係左軚嚟喎……
記者：車報員
