每日有超過4千部巴士喺街上行走嘅九巴，旗下有一支擁有19部緊急維修工程車嘅車隊，分別駐守多個主要總站為巴士進行檢查同緊急維修。日前，一部由全新Hino700系列24噸貨車改裝而成嘅工程車投入服務，佢唔只內藏超過50件維修巴士用嘅零件，而且仲係首部符合歐盟4型環保條例嘅工程車㖭！
現存喺九巴維修車隊內嘅緊急維修工程車中，絕大部份喺千禧年後購入、兼符合歐盟2及3型嘅日本及德國出品，而新近投入服務嘅Hino700系列工程車，則完全符合歐盟4型環保條例。新車配備歐盟4型引擎，並採用廢氣再循環技術，配合超低硫柴油，減少廢氣排放，同時又新加入慳油行車模式，藉鎖定車速嚟控制耗油量。
新工程車可拖動淨重約16噸嘅12米雙層巴士，車斗內又擺放超過50件維修巴士用嘅零件，另外仲有可吸走路面油污嘅吸油棉，以及可方便工程人員更換重型零件嘅吊臂。為方便工程人員進行夜間維修工作，車內亦有手提閃燈及強力射燈等配備，可說周身刀，張張利！
記者、攝影：鄭達基
