白花油王子顏福偉上月被控非禮兩名男的士司機罪成，判處社會服務令180小時，他更辭去集團行政總裁職位，但昨日他接受訪問時卻自爆仍有後遺症。現在需接受心理治療的顏福偉揚言怕見人，沒膽坐的士，遭身邊朋友離棄，甚至沒人願意再找他演出校園騷，故現時他寧願叠埋心水，為四川及緬甸兩地災民落力籌款。
現年46歲的顏福偉早前涉及兩宗非禮男的士司機案，在庭上公開雙性戀傾向後，已先後召開謝罪記者會及辭去上市公司白花油國際有限公司行政總裁職位補鑊，至上月初他被判罪成，判處社會服務令180小時，同時他自行接受精神治療。官司結束至今一個月，顏福偉甚少公開露面兼表現低調，昨日他接受商台電話訪問時，才透露自己仍需面對不少後遺症。
積極振作
「我失眠咗好耐」
被問到現時搭的士會否有麻煩時，顏福偉無奈地說：「唔搭的士啦，仲搭咩？都有司機，有時自己揸車。」他又稱慶幸一直獲家人支持，但朋友卻捨他而去，他說：「我肯出嚟做訪問要衝破心理關口，屋企人幫我好多，細佬喺官司費用上面幫咗我，我多咗錢就可以幫手賑災。朋友就走咗好多啦，之前以為係好好朋友嘅，有啲冇聯絡，有啲以為唔係朋友，但會打畀我或者SMS畀我。」
過去顏福偉經常演出校園騷，如今則無人問津，他說：「𠵱家冇人搵我，如果搵我，我可以同佢哋分享吓度過心理關口嘅情況，啲人經過呢啲時候點樣調節自己。」他還指自己在調適期間感到很辛苦，他說：「之前搞音樂會已經唔係瞓得咁好，後尾發生事我失眠咗好耐，後來開始打坐。」
訪問中，顏福偉直認現時仍需接受心理治療，每三星期看一次心理專家，他說：「但佢冇幫我做評估，都係同我傾吓近況。5月嘅時候我心情都未平復，佢鼓勵我做啲想做嘅嘢。」結果他選擇行善，幫助四川和緬甸兩地災民，為他們積極籌款，所以他在6月1日曾低調現身《演藝界512關愛行動》大滙演，與演藝人協會一班藝人合唱籌款。
現身籌款
克服心理關口
顏福偉形容他在5月份有不開心經歷，又發生天災，他說：「雖然心情差，但都要快啲復原。國家有難，都想出分力幫手，之前我去過緬甸十幾年潛修，都好了解嗰邊情況，亦要出分力；至於四川方面，我鼓勵公司嘅員工，佢哋捐幾多，公司就捐三倍，都籌到二十幾萬，另外又捐錢去紅十字會，喺銅鑼灣義賣。我鼓起勇氣去6月1號嘅活動，演藝人協會其實打過畀我好多次。」被問到當時有何擔憂？他說：「唔想見人，個心理關口好大壓力，之後6月2號都去幫緬甸風災做籌款。」
顏福偉續說：「緬甸𠵱家好需要清潔嘅食水，需要開水井，其實開一個水井要5,500蚊，𠵱家佢哋重建中，我都有幫手做籌款記者會嘅聯絡工作，而且我想搞個圖片展，將災區嘅情況畀大家睇，如果有關團體有版位出到呢的相，我有好多獨家圖片，可以講吓救災情況。」至於會否到災區探訪，他則說：「我想去緬甸，但寧願十個醫生過去，唔想搞住人，我又唔識救災。」
撰文：林妃
官司後四大失落
娛樂資料庫：庭上自辯直認雙性戀
多年來一直性向成疑的顏福偉，去年10月舉行演唱會後，接受傳媒訪問時談及自己的性取向時，他直言：「男女都冇乜所謂。」首次暗示自己的雙性戀傾向。同月月底，顏福偉因涉嫌在的士內非禮男司機被捕，其後於去年年底，再有一名司機報案，指03年曾被顏福偉非禮，最後顏福偉被落案檢控兩項非禮罪名，今年4月他在法庭上自辯時，直認「我係雙性戀者」，更剖白自小知悉自己有同性戀傾向，但間中有女朋友。
福仔大學校園領風騷
「白花油王子」顏福偉向來熱愛音樂，多年來經常親自上陣拍攝旗下產品廣告及主唱廣告歌，06年其廣告歌曲《夢想有你》在多個香港網上討論區廣泛流行，更被暱稱為「福仔」。去年福仔被指貌似聲稱是龔如心千億遺產唯一繼承人的陳振聰，加上歌曲《愛多80年》每晚均在黃金時段熱播，令他人氣大增，除獲無綫節目《勁歌金曲》邀請任嘉賓外，就連科大、中大、樹仁、浸大和嶺大也先後邀他演出校園騷，大受學生歡迎，去年10月他更在葵青劇院舉行一場「有福同享顏福偉愛多80年講唱會」，全場300座位爆滿，風頭一時無兩。
