船王趙從衍兒子、72歲的卓能集團主席趙世曾，身邊女友如車輪轉，但唯一心頭好，愛足幾十年，就是打籃球，他堅持每周打籃球一小時keepfit。趙世曾擁過億身家，雖然日食10餐，但經常慳家將剩飯打包，他解釋這是用心理戰勝食慾的方法，以維持六分飽食量及170磅體重，不浪費食物，總算環保！ 撰文：林妙萍
已故船王趙從衍的長子趙世彭數年前已過身，幼子趙世光四年前中風入院，至今仍要坐輪椅。惟獨今年72歲的兒子趙世曾，仍然精力十足，經常拖不同女友去ball、聽演唱會、打籃球、跳社交舞，最愛激烈運動。
趙世曾近50年來體重上落不超過10磅，最重180磅，現時維持170磅左右，他曾揚言多得運動有功。每逢星期三趙世曾會落場打籃球，無固定球隊。早前，他與一班前甲組籃球隊隊員、體育老師等，在何文田路德會包美達社區中心打波。
將赴京睇奧運
一身黑色背心球衣的趙世曾，古稀之年，身形keep得似50多歲。打波時，他在場內都算活躍，左右兩邊場跑，mark人、攔截，跑跳拍波，大叫「後面！後面！」、「畀啦！」、「圍佢！」，非常投入認真，不過，畢竟身嬌肉貴，趙公子絕少同人鬥撞搶波，在人堆中搶籃板更加少之又少。一晚齋打個多小時，消耗過千卡路里。
趙世曾在場邊接受訪問時，汗水大顆大顆滴落地，他喘着氣說：「由十幾歲開始打後衞，梗係年輕時打得好，轉身都快啲啦！𠵱家年紀大咗，氣力梗係冇咁好，但鍾意出一身汗，打慣咗，以我嘅年紀，唔做運動好肥㗎。」他補充說：「錢賺少啲都得，應酬可以唔去，波一定要打！」又展示他多年來打波「拗柴」，骨折變形的左手尾指，及動過小手術的右手拇指。
熱愛籃球的趙世曾，是香港籃球總會永遠名譽會長，8月會與總會成員去北京看奧運籃球，他指中國籃球勝算不高，難入三甲，但補充說：「中國籃球相信係有史以來最好，上一次打到世界八強。」怎看中國籃球明星？他說：「姚明啲波幾實際，但冇乜花款，靠人高。」他的新舊個人心水，是高比拜仁和米高佐敦。
身體健康，飲食絕對是重要一環，勤做運動keepfit的趙世曾，在食這方面，卻自認缺點多多。他無視醫生告誡，專吃濃味，想食就食，由炸油條、茶餐廳多士，一日食十餐八餐當平常事，最壞習慣更是臨睡前在床上消夜，食完即睡，完全沒有時間消化食物。
啪丸減肥無效
一般OL、師奶試過的啪丸減肥法，趙世曾都試過：「一種係食完冇胃口，一種係食完唔吸收，屙番出嚟，唔得，好難受，試過好短時間，唔得。」其後，他改打心理戰，用他口中「思想上嘅控制，好過藥物上嘅控制」作理念。趙世曾經常被發現食飯後，將剩飯剩菜打包返屋企的慳家舉動，他解釋正是自己的「外賣心理學」。
趙世曾說：「我食嘢唔會食飽，以前食七分，𠵱家食六分飽。點菜時心多，食晒一定過龍，你個心諗住可以打包，就唔會迫自己食晒落肚。打包返屋企係好好嘅方法，唔浪費食物，又可以做消夜。」
每年三次體檢
作息分配都因應年紀改變，趙世曾現在奉行自然睡的習慣，他承認家族遺傳血壓高，自己也要長期食藥控制，每年會到律敦治醫院找心臟科主管及顧問醫生劉育港做身體檢查三次，以防小病變大事。
趙世曾身邊從不缺乏女伴，多年來，隨口數，都有盈盈、姚煒、TerriHolladay、馬慧、烏仁，及近年的許冬梅、金妙英等，他說：「今日講健康，唔好講女仔。不過呢，女朋友令到你個人開心嘅，心情好嘅，身體梗係好啲啦！」聽清楚，是女朋友才開心，不包括太太。
攝影：陳志嵐、羅慧敏
知多啲：跳舞打波一樣弗
趙世曾喜歡做的運動種類五花八門，籃球、游水、高爾夫球、跑步、跳社交舞、落的士高跳舞等。訪問當中，他大讚籃球運動量夠大，一年四季、晴天雨天、單人都可以打。競賽式的籃球，的確消耗極多卡路里。
運動（1小時）
打籃球 卡路里消耗：653
游水 卡路里消耗：469
高爾夫球 卡路里消耗：265
跑步（緩步跑） 卡路里消耗：540
社交舞 卡路里消耗：234
的士高舞 卡路里消耗：428
註*以趙世曾170磅計算
波友小八卦：徐嘉諾就住嚟打
趙世曾愛波友無利益衝突，波友果真不客氣，絕無畀面這位身家過億的有錢人，採訪當日不時在記者面前揶揄趙公子花弗媾女兼孤寒，「老細（指趙世曾）攬人唔算叻，攬女仲叻。」、「有錢？你想佢請飲支汽水都難。」
評趙世曾球技
只有體育評術員徐嘉諾比較客氣，提醒趙世曾有傳媒訪問，應該叫大家執正啲，換隊服。至於趙世曾球技如何？徐嘉諾說：「以佢咁嘅年紀、身份，咁鍾意打波，已經好難得，大家都會就住佢。」
