將會為亞視主持奧運的袁彩雲，近日忙於撰寫她將在書展推出的中菜食譜及熟讀奧運資料，前晚，她抽空亮相《蘋果》網站直播節目《娛樂開CHAT》，與主持懷鈺大談與「港版馬英九」男友相處之道，她表示每日靠上網視像見面才可維繫感情，更坦言未曾用美食留住男友的心，她說：「我同佢不知不覺拍拖年半，但我都冇煮過一餐畀佢食。」不過她就大讚男友性格成熟、遷就到她的脾氣，她說：「佢𠵱家慘啦，我𤷪𤺧嘅時候佢受晒喇！」但二人未有計劃結婚。大家可登入《蘋果》網站 http://ent.appledaily.com隨時重溫節目。
採訪：葉雪
攝影：林德雄
袁彩雲髮型：BillyChoi（HairCulture）
懷鈺髮型：MattChiu（XENTERJUT）
主持奧運有壓力 JoJo
JoJo：頭先聽你講你會做奧運嘅主持，咁你第一次聽到呢個消息嗰陣時，你有乜嘢感覺？
袁彩雲：興奮，但同時又好驚，因為自己未準備好，𠵱家度度都倒數，所以好緊張，好有壓迫感，但我會樂觀面對。
JoJo：我知你係96年港姐，卸任後有冇繼續做一啲慈善工作，保持形象呀？
袁彩雲：我嘅形象一向都係飲飲食食，咁當然我都會做一啲慈善工作，因為我係慧妍雅集嘅成員啦，佢係政府認可嘅慈善機構，上年我哋都去咗上海新天地影咗輯相集紀念我哋個會25周年，好好咁又有贊助畀我哋可以去做呢本相集，你哋見到入面啲相好靚，影到唔似我哋。
主持：JoJo，靚唔靚呀？
JoJo：好靚呀，直情係判若兩人呀！
袁彩雲：真係每個人都好唔同好靚，我覺得好有意義呀！
嗜日本菜貪新鮮 小Ann
小Ann：你煮嘢食咁叻，咁你會唔會對食好有講究？例如最鍾意食乜嘢菜？你喺德國大嘅，會唔會好鍾意食德國菜？
袁彩雲：我最鍾意食日本菜，因為夠新鮮，我跟韜韜（梁文韜）啦，佢就話有新鮮嘅材料就最好食，我都鍾意食廣東菜，尤其近排我好鍾意食豆豉鯪魚炒油麥菜。至於德國菜呢，我鍾意食德國腸，大家唔好笑呀，不過我真係好鍾意食，不論大細、長短、粗幼，都好好食。
主持：我都要話畀小Ann知，我試過喺佢屋企食過生豬肉腸呀，我當時幾驚，阿媽話食生豬肉會生蟲吖嘛，但佢同我講話食到佢咁大個都冇事，你就食啦！
小Ann：你頭先話想做唔同嘅嘢，做首飾，同出烹飪書，咁你下一步想做乜嘢呀？
袁彩雲：其實我都想出其他書，例如一啲講感情嘅書啦，因為身邊有一啲好得意嘅故事，可以寫出嚟畀你睇咗之後有啲啓發，可以攞到經驗。而呢本書大家應該會10年後先睇到，因為我寫書比較慢。
周柏豪鄭融詹瑞文下周輪住CHAT
各位娛樂版擁躉，有興趣和你的偶像傾談嗎？《娛樂開CHAT》下周請來周柏豪、鄭融及詹瑞文擔任嘉賓，分別於6月10日（下周二）和6月11日（下周三）與讀者談天說地，參加者同時有機會得到偶像珍藏禮物，只要你有webcam及headset，並於當日6:30pm準時登入 http://ent.appledaily.com即可，節目於當日7:00pm在《蘋果》網站直播。
