東方電影投資的電影《一代宗師．葉問》由4月開拍至今，是非一直未停過，繼被指搶王家衛的《一代宗師》戲名後，昨日中國星又炮轟該公司簽了旗下演員安志杰拍此片，但最後棄用又不肯付清尾期片酬，逼得只好採取法律行動。
曾演《神探》的安志杰一直十分欣賞導演葉偉信，所以今年2月葉偉信找他演出東方公司投資的《一代宗師．葉問》，他極高興並立刻交由經理人公司中國星代洽談合約，並於2月底收下3萬元定金，而餘下還有10萬元片酬未支付，中國星發言人李小姐昨日接受電話訪問時說：「電影公司原本通知安志杰3月初到上海開工，但臨出發前一日，佢先收到通知要延遲，到3月底，製片打嚟話唔可以用佢，但就冇交代未畀嘅10萬片酬。」
隨時對簿公堂
4月30月安志杰與東方電影的合約屆滿，東方始終沒有再交代事件，李小姐稱：「我哋已經發過幾次信去追收其餘拖欠嘅片酬，但東方電影唔理我哋，雖然話佢哋有自己問題唔用得安志杰，但當初大家簽晒合約，連定金都畀埋，𠵱家唔用，並唔係我哋責任，所以依照合約規定，東方電影始終要支付其餘10萬元片酬，其實安志杰因為欣賞葉偉信，所以佢接呢部戲只收半價片酬，減晒價畀佢哋，𠵱家連尾期都唔願意找，公司只好採取法律行動，日內會向東方公司發出律師信。」
東方電影公司發言人陳小姐了解過事件後，昨日回應本報記者說：「今次用唔到安志杰係因為內地配額問題，因為合拍戲需要有一定數量嘅內地演員演出，最後只好犧牲佢，雖然雙方係簽咗約，但最終公司用唔到呢個演員，我哋曾要求過想片約順延到下一部戲，但中國星唔同意，咁我哋都冇辦法，如果佢哋要告，惟有同佢打官司。」
改名免傷和氣
此外，東方電影與王家衛的澤東公司同時有意開拍詠春宗師葉問的故事，而且02年王家衛已宣佈開《一代宗師》，最近東方公司又宣佈開拍《一代宗師．葉問》，由於片名太過雷同，王家衛即時批評該公司，在各方壓力下，昨日東方公司正式將戲名改為《葉問》，避免再傷和氣。
採訪：李全
