為《蘋果日報》撰寫專欄的黃偉文（Wyman），上月底推出集結了兩年多、過百篇文章的時裝書《生於天橋底》。Wyman自細熱愛時裝，視時裝是一個崇高和有格調的hobby，也是生活的調劑品，所以幾乎每日都會出發勤力打獵（shopping），更覺得購物給他的快樂就有如坐過山車一樣high的快感。
鬼馬 改衫孩子王
一書三冊的《生於天橋底》是結集了黃偉文過去兩年為《蘋果》撰寫《BuyMeaSunday》專欄的心血結精，把他對時裝、shopping的點滴與讀者分享，雖然「最鍾意買嘢，最憎寫字」是Wyman的金句，但他偏偏以寫作、作詞為主。新書推出頭兩天Wyman已收到出版商加印的消息，他說：「本書成功『上市』主要係想試吓脫離報紙之下獨立出來嘅反應。」
熱愛時裝的Wyman，覺得時裝是一個崇高和有格調的興趣，也是生活的調劑品。生於小康之家的他，由於母親會做衫，他自少已經對時裝產生一股熱情，中學時代曾為《年青人週報》撰寫時裝稿，校服也要與別不同，Wyman說：「嗰時會專登到布行配布再搵旺角啲師傅做校服，專門喺一啲『吹你唔脹嘅位』加自己鍾意嘅details，老師又發覺唔到，嗰時資訊冇𠵱家咁發達，時裝知識可能只係從粵語殘片或電視中得到，兼收並蓄，自得其樂。」
本能 5分鐘裝扮
大家都以為Wyman一定是個十分姿整的人，但是剛好相反，他說：「平時出街都只係花5分鐘就可以出到門口，憑本能，加上平時行街行得多，喺時裝方面浸淫得越耐就襯得越快。」最愛買嘢的Wyman不論衫、鞋、襪、袋等都買得一餐，連名牌推出的collectibleitem都不會放過，他說：「我8、9年前買過Hermes單車，又買過Gucci水泡，買咗返屋企先發覺唔等使，之前心思思想買Margiela嘅單車，考慮咗一個星期至打消念頭，咁多年來搬屋多數都係為咗要更大地方處置啲衫，大概三分一嘅屋租係儲物費。」
在Wyman心目中，衣食住行當然是「衣」佔其生命最重要位置，所以每逢換季都是他最興奮的日子，他雀躍地說：「每逢換季我都會特別excited，因為名店sales會通知我有新貨到，我會一早好勤力去打獵，有時睇完Paris場騷已經即場同香港嘅買手訂貨，例如今日件CommedesGarcons三層恤衫，睇騷時已一見鍾情訂返來，所以街行得密或睇騷，啲人只係見到我食野味，其實我好勤力咁7點已經上山打獵。」
超賺 齋買都興奮
Wyman熱愛購物的程度已屬非一般人的境界，不過他並非購物狂，認為買的時候快樂就值得，他說：「我係為買而買，不過我唔知咁會唔會令我變成購物狂，每次買嘢時，我會知自己點解會買，雖然有時到季尾都冇着到，以前會覺得可惜，近年覺得買嘅時候快樂已經值得，等如有啲人會山長水遠去主題公園坐過山車，之後得到啲咩？只係坐嗰30秒快感，買衫都等如坐咗一次過山車，雖然事後未必有場合可以着到，但使錢、碌卡、試衫嗰下已曾經快樂過，當你$1,000買咗件衫，已唔係白費，況且着嗰件衫出街，你仲有第二次帶來快感嘅機會，着得靚畀人讚已經係bonus，所以，以『狂』嚟講，我唔算喇，而且我從來都唔會使我冇嘅錢，人生辛苦咁多年就係為咗呢一下快感！」
我的時裝聖經
問：邊一本時裝雜誌係Wyman嘅fashionbible？
答：我覺得冇一本特定嘅fashionbible，如果大家都睇緊《Vogue》，大家嘅形象都會變成一模一樣，着衫一定要有個人風格，行街、睇戲、食飯、新聞、小說等都可以搵到靈感，每個人嘅裝備都唔一樣，所以我鼓勵大家喺不同嘅事物搵自己方向，呢個世界先至有趣，或者你會有一日喺《NationalGeographic》當中塔斯曼尼亞品種嘅蝴蝶圖案搵到顏色嘅配搭，唔一定係fashionmagazine。
$120BuyMeaSunday
一書三冊的《生於天橋底》結集了Wyman自06年3月至今，過去兩年為《蘋果》撰寫《BuyMeaSunday》專欄的心血結晶，是他第三本有關時裝的書，今次製作班底是一向與Wyman合作開的朱祖兒，更請來日籍抽象畫師SatomiMizuuchi畫封面，售$120。
採訪：JessicaNgan
攝影：ChenWaiOn
場地：BBC&IceCream（中環安蘭街）
