世上無難事，只怕有心人。這十字真言對黃貫中（Paul）而言，絕對有血有汗，他去年搞rock騷蝕十幾萬，嚇到面青唇白；今年他又豁出去，rock騷第三round本月底開鑼，會否歸本未知，但自比文火仍懷熾熱理想的Paul，卻自稱富有過李嘉誠：「我有嘅嘢比佢多！佢經歷過啲乜嘢？」
黃貫中的硬淨像死症，他貫徹了rock友的打不死精神，有時候會固執得叫人哭笑不得，但他快樂。像去年他親自主理兩場「Let'sFightlive」搖滾騷，蝕到攤攤腰，但回氣後又捲土重來，於本月30日假九展再開騷。
「Let'sFight」的騷名沒改錯，Paul由頭戰鬥到尾，日前他在土瓜灣band房接受訪問時說：「我希望年年都搞呢個騷，我知道唔易，但會繼續爭取。因為我係樂手，又扮演埋監製，面對問題好多，由申請場地、宣傳、曲目編排、食乜嘢外賣、點拎pass入場都係我，但學到好多嘢。」
「嚇到面都青晒」
Paul想起去年搞rock騷仍心驚驚，原來開騷前幾日賣飛情況持續慘淡，嚇到他一額汗，他說：「當時助手話賣得兩成飛，面都青晒啦！我仲叫佢落兩份報紙全版廣告，可能佢覺得我黐線，見到老闆採取自殺式行為。不過我唔咁做，邊會有人支持？落埋報紙廣告、電視廣告，咁我先死得心息，知道死喺邊，最緊要係問心無愧，如果天要亡我，我真係笑住面對，因為我已經盡晒力。」
皇天不負有心人，開騷前終於搞掂，兩場門券售罄，Paul興奮到無倫，他說：「做人有乜開心過呢一剎那？我唔夠膽講自己大把錢，但食少啲、着少啲，我又未至於餓死，你睇啲災民幾慘，我已經好幸福、好富有。某程度上，我覺得自己富有過李嘉誠，佢雖然幾千億身家，但我有嘅嘢絕對比佢多，我可以打wargame，可以做200下situp，李嘉誠得唔得吖？其實你經歷過啲乜嘢？我唔羨慕。」
Paul蝕本是因為去年沒有贊助商支持，但他蝕得甘心，他說：「勞民傷財搞一日，舊年蝕十幾萬，但我覺得係賺，換嚟係以後可以大大聲講我做過，你唔使旨意滾我，一粒螺絲兩毫子，你唔好同我講係兩個半。舊年我冇贊助商先會蝕，今年我哋開始有贊助，已經有進步、有人認同。」
「夠膽承受失敗」
其實Paul心中那團理想之火，多年來從未熄過，他笑道：「我個火收細咗啫，由紅色變黃色，再調校到藍色，但唔代表我火唔大，我文火可以煲得更入，你要燉熟就要用呢種火，猛火一下就冇；人大咗、碰釘多咗，猛火隨住年紀變成文火時，就會夠膽坦然面對錯誤同承受失敗㗎啦！」
採訪：朱倬誼
攝影：陳順禎
化妝：KeiKei
服裝：double-park
