【本報訊】點點燭光映照出張張幼嫩的臉孔。解放軍開槍鎮壓那年那夕，他們仍是手抱的嬰兒，甚至未出娘胎。幸好香港有群真正心繫家國的教師，多年來默默在課堂裏、課餘時，向學生講解六四真相。維園昨晚舉行燭光集會，有不少首次參加的年輕人。燭光下他們認識歷史、低頭垂淚，有女生即場決定加入支聯會當義工，爭取平反六四。記者：雷子樂、梁美寶、馮永堅
中四的陳詠茹昨與20多位同學首次來到維園球場，參加燭光集會。她說，中文科老師偶爾會在課餘時間，給同學講解89民運，昨更帶她們出席集會。詠茹跟大隊燃點燭光，聽着大會致悼辭，跟隨參加者高唱《血染的風采》等民運歌曲後，被現場氣氛感動了，「我決定要企出嚟做義工，為平反六四出一分力。」
從事教育工作的陳先生昨買了快餐食品，與三名5歲至9歲的子女到維園共享「燭光晚餐」。他首次帶同子女悼念六四，「大女都9歲，係時候畀佢知多啲89年發生咗乜嘢事。」為人師表，他有感近年多了學生對六四一知半解，誤信解放軍因鎮壓暴徒而開槍這個「官方版本」：「作為家長同老師，有責任畀小朋友認識真相。」
「最難忘挺身擋坦克」
15歲的潘濬江，已出席了13次燭光集會。「細個剩係記得喺維園瞓着咗好多次」，升上小學後，他開始對六四事件有了感覺，「最難忘係王維林挺身去擋坦克」。20歲的羅同學昨首次來到維園，他說：「當年我得兩歲，好陌生，所以今日主動嚟了解多啲。」
除了燭光集會，不少學校昨日舉行讓同學認識六四的活動。香海正覺蓮社佛教正覺中學的老師昨舉行特別周會，向全校約800名中一至中四學生講述六四事件。支聯會播放約20分鐘的六四新聞片段。中學生看到屠城一刻，一名穿白袍的男子無懼槍彈不斷高呼「自由」、大學生被槍殺、王維林隻身阻擋坦克車前進，多名女生忍不住哭起來，禮堂瀰漫哀傷氣氛。
「唔明點解唔坐低傾」
中四理科生徐倩怡哭着說：「我本身唔清楚呢件事，我覺得佢哋殺人太殘忍、好慘，唔明點解唔可以一齊坐低傾？希望國家都可以承認呢段歷史發生過。」負責統籌活動的歷史科劉老師說：「19年前，大學生爭取民主運動，俾人當係暴民，我好希望政府承認呢場係民主運動，還佢哋一個公道！」
風采中學副校長何漢權表示，該校每年堅持舉辦六四周會，向學生重溫歷史，「我擔心咁重要嘅歷史事件會被埋沒。」他說，現時只有小部份初中中史教科書會略提89年發生了一場風波、發生了一場流血事件，但無詳述該事始末。
《集會人士心聲》
佩服六四學生
大學生郭小姐（右）：「中六開始每年都參加六四集會。Daddy有好多六四史料，錄咗好多電視新聞畀我睇，但唔係太詳盡，最近我上YouTube睇番。如果中國有民主，貪污可以改善，四川嘅人禍都可以避免。我自己𠵱家同當年廣場上嘅學生一樣年紀，佢哋為咗國家未來放棄前途同生命，我非常佩服佢哋嘅勇氣。」
上網認識六四
會考生鄺同學：「我今年17歲，六四嗰陣仲未出世，我都係大個咗透過睇支聯會網頁先知道事件經過。我覺得當時嘅政府應該同學生對話；如果政府肯對話，咪可以改善貪腐問題，如果中國變得廉潔，就唔會有豆腐渣工程，四川大地震就唔會死咁多人！」
我年年都想來
深圳居民馬先生：「我在03年才首次接觸六四的資料，在內地怎可瀏覽到這些敏感資訊？背後全靠一些非法軟件。當知道六四事件的來龍去脈後，一直想來香港悼念，但今年才弄到證件。我會將燭光集會的相片傳給內地的舊同學、同事看，讓他們也知多一點。如果可以，我年年六四都想來！」
生於六月四日
李先生：「我生於6月4日，但自從89年之後，每年六四我都冇慶祝生日，改去燭光集會。每年到咗呢個時候，我心情都好似去送殯咁。我覺得六四同四川地震都有關係，因為地震死咁多細路仔，除咗話係天災，都有一啲人為因素，同六四開槍鎮壓一樣，都係人禍。」
好想青年參與
大學生吳小姐：「五年前我第一次嚟六四集會，初時覺得呢度啲人個個好嚴肅，唱歌嘅氣氛好莊重。嚟咗五年，我發覺參加者多數係上咗年紀嘅一群，可能係佢哋老咗啦。所以，我真係好想好似我呢類年青人，可以多啲嚟燭光集會，如果唔係，六四好快就會被淡忘。」
每想起都傷心
林先生：「19年嚟我風雨不改出席燭光集會。自從解放軍開槍鎮壓後，我諗起坦克、機關槍，就會傷心到瞓唔着！我最希望有生之年，國家可以平反六四，就算平反唔到，政府都應該好似哀悼地震咁，為六四死難者下半旗。只要我有氣有力，都會參加集會，直至平反六四為止！」
你的意見?
●你認為新一代有需要認識六四事件的歷史嗎？為甚麼？
●你會透過何種方式向年輕人講解六四事件？
請電郵至：mailto:[email protected]
或傳真至：23703283
或發短訊至：60107999