全球暖化問題不容忽視，環保混能車越趨重要，德國寶馬Hydrogen7更嘗試用氫動力追求零污染，連香港巴士都開始轉用混能，你仲好意思喺馬路上噴黑煙？就算自私啲只為荷包着想，揸幾千c.c.凌志耗油量僅如1.5公升車仔，想嘆都未必要別人受罪。
今日係世界環境日，係時候好好反省一下，無謂要子子孫孫只剩得假花欣賞。
記者：徐影龍
攝影：王文忠
Model：Roxanne@StageModels
靜到以為未撻車
皇冠車行將4、5月定為HybridMonth，早前先試RX400h，今勻輪到長測最頂級嘅LS600hL，雖然我只係揸咗一日，但圍住港島試車同搵景影相，足足揸咗七個鐘，塞車、高速、上斜、泊位全部嘆過，對呢趟混能之旅真係有另一番體驗。
上車Keyless按掣撻車先嚟一記驚喜，以電動摩打啓動，靜到唔覺着咗車，揸汽油車10年無打冷震有啲唔慣，誠惶誠恐以為未撻車，呼啖油個心先定番啲。可能我揸車粗魯，LS600hL起步都幾柔順，喺工業區大啖油玩0-70km/h，無想像中咁推背，我梗知凌志一切以舒服穩定為主，但揸住5,000c.c.V8車好難忍手唔試。
大凌入彎依然穩陣
過海上東廊，速度去到70km/h後令我真正感受LS600hL過人之處，不但越行越順、動力源源不絕，最重要係靜！碰啱當日風和日麗，喺東廊上傍住大海遊車河，同車幾個人不自覺收聲，靜靜享受嗰種和諧氣氛，藍天，真係值得大家珍惜。
一早同Model講咗今日遊長途車河，開始進入漫長山路，唔會急住搵景影相，有路就行。經過深淺赤石一大段路，雖則LS600hL無推背感，但玩彎依然有一手，幾個連續急彎特登急收快出，無減穩定性，表現絕不似大牛龜般又慢又鈍，而且懸掛設定得偏軟，入彎不見得突兀。
值得一提係全車安全指數超晒班，全四驅防滑差速、VDIM系統、精鋼車架、13個安全氣袋等，點會唔安心？
嘆住聽EarthSong
車廂所有設備實在太豪華，基本上所有嘢都係電子控制，輕輕㩒吓就可校到啱坐為止，除咗開門閂門，基本上搞乜都唔使用力，前後排真皮座椅又好軟熟，加上全球首創嘅車頂冷氣系統，舒服到令人昏昏欲睡，沿途山邊樹影向後急走，又係一個令人減壓嘅環境。偷瞄後排Model，一邊享受住氣壓式按摩座椅同Ottoman電動腳靠，一邊望窗沉思嘅樣真係好靚好吸引。
襯着DVD音響傳來MichaelJackson的《EarthSong》，大嗌副歌時嘅控訴聲在車內19個MarkLevinson喇叭游走，着實有警世意味。
規格表：
引擎：4,969c.c.V8配雙電動馬達
馬力：445ps
扭力：53.0kgm/4,000rpm
傳動：E-CVT無段變速自動波，四驅
查詢：皇冠汽車（25119430）
有意義的六五
早在1972年6月5日，聯合國就已舉辦首屆人類環境會議，1,300名各國代表聚首，仲將呢日定為世界環境日（WorldEnvironmentDay），出發點係改善及保護環境。每年6月5日，聯合國環境規劃署亦會發表有關世界環境狀況的年度報告，等大家檢討及改善。
車主應盡綿力
環保係一種態度，減少浪費係基本功，有車人士其實仲有好多嘢可以做。停車熄匙，勤啲Check車換偈油，太舊嘅搵食車無謂夾硬揸落去，嘥油又多黑煙，早啲同政府申請換歐盟IV型嘅環保車好過。仲有少開冷氣，遊車河吹自然風其實仲好Feel。
丹尼斯教路：慳油風琴腳
話說編輯龍畀咗部車我用兩日一夜，嗰晚由葵涌去大埔接朋友收工，然後沿林錦公路經錦田去元朗食消夜，隨後再沿青山公路載佢返屯門，去到安定邨附近油錶幾近指向E字，但電腦計算出仍可行約70公里，我決定由屯門折回元朗，再去貨櫃碼頭路嘅油站入油，最後電腦顯示尚可多行40公里！喺呢個「着住油燈繼續行」嘅路程入面，我一直維持輕踏油門嘅踩油方法，雖然冷氣一直無熄過，但行車電腦竟計算出平均耗油量僅9.6L/100km，即每公里約$1.6，以接近6.0公升表現嘅秏油量計，數字真係贏到好多房車仔。
揸混能車嘅你，亦可參考我呢種「輕力風琴腳」揸法，當車行順咗就縮腳唔踩油，到車開始乏力或上斜嗰陣先再輕力踩油，咁就可以做到偏低嘅耗油量。