呢排俗稱機頂盒嘅數碼廣播接收器巿場都風起雲湧。本地薑PixelMagic前日包咗IFC戲院其中一個House，介紹佢哋全港首部高清電視硬碟錄影機MTV5000。咁大陣仗，小藍當然到場試機啦。
500G硬碟錄85小時
PixelMagic總監崔釗偉(Nelson)話，𠵱家啲機頂盒錄影要外置USB硬碟，操作麻煩，錄影穩定性麻麻。佢哋研發內置數碼廣播接收器嘅錄影機MTV5000先至係主流，500G硬碟錄到85小時高清節目，錄影質素比USB好，仲有埋MHEG5互動功能。
Nelson話，部機賣點操作簡單，一按式錄影功能、七日電子節目表，又可以將錄咗嘅節目按喜好分類等。小藍見到部機又幾user-friendly，但價錢又點先？Nelson話部機賣4,980蚊（嘩，都幾貴喎！）
影音專家Alan認為MTV5000都係過渡產品，最終版本應該係藍光碟數碼廣播錄影機，以燒碟嘅形式先至真正保存到高清節目，「部機係有500G，但都會爆滿，再錄番外置USB儲存，咪又係行返舊路。」Alan話，𠵱家機頂盒嘅錄影質素都幾好，加埋外置USB，2000幾蚊搞掂；MTV5000優點係操作方便，最啱師奶用，但賣成5,000蚊，消費者應按需要自行選擇。