今日在港上映的電影版《色慾都市》（SexAndTheCity），是該劇的延續。劇集第六輯的結尾，講述Mr.Big與Carrie復合，電影開首便講述Carrie籌備婚禮，可是兩人大婚之日，Mr.Big卻臨時縮沙，Carrie與Mr.Big再度分手，不過最後兩人都成功結婚。
至於治癒乳癌的慾女Samantha，則與年紀比她小一截的演員Smith繼續同居，但Samantha難改放蕩性格，繼續紅杏出牆。Charlotte，與丈夫領養了一亞裔女童，幾經波折，Charlotte終於懷孕。
電影版在港被列為三級，但片中的過火鏡頭不多，其中一幕是慾女Samantha偷看男鄰居冲凉，鏡頭拍到男角下體的側面，而另一女角Miranda也有全身裸露的鏡頭。《色》片上周在美國大收約4.37億港元票房，比排第二的《奪寶奇兵之水晶骷髏國》（IndianaJonesandTheKingdomofTheCrystalSkull）的票房多收約7,800萬港元，認真厲害！《色》片前晚在UA時代戲院舉行首映禮，前往欣賞的藝人均戥Carrie和Mr.Big終成眷屬開心。
全城熱評
麥兆輝：逃婚感動
我98年開始睇，咁多年，啲角色都好掛住佢哋，靚人靚衫呢啲冇得講，但係節奏唔係好夠快，可以短20分鐘左右啦。最深刻個場戲係Mr.Big逃婚個場，唔使等Carrie走到入禮堂，只安排咗佢打個電話就發現，咁仲好，幾感動！至於被列為三級片，我覺得呢套係輕鬆喜劇，可以剪少少，等佢唔好係三級，多啲人睇囉！
黃偉文：同Carrie撞衫
無論拍成點，我都會捧場，因為睇咗咁多季，志在敍一敍舊。我一向覺得四個人分贓唔勻，SJP太多戲，如果佢身邊人嘅戲份多啲會更好。衫呢，不嬲佢四個嘅衫唔係為靚而睇，係換得多，佢哋四個啲衫都係錯錯哋，但呢個係令佢哋可愛嘅地方。至於片中最深刻嘅fashionitem，係Carrie喺屋企寫稿，佢件灰色嘅NinaRicci冷衫，我都有件，係睇咗咁多年嚟，第一次同佢撞衫。
卓韻芝：睇得開心
同預期一樣，冇驚喜冇accident。拍得最好係悔婚個場，非常好，好有張力。成套片，由頭到尾係一個fashionshow，不斷睇衫，不斷睇唔同style，係一個好令人開心嘅過程。同埋幾成功嘅一點，係好坦白，冇刻意將啲女主角扮後生，冇抹晒佢哋嘅皺紋，照咇佢哋胳肋底啲肉，講嘅都係40歲後面對嘅問題，坦白得仲舒服。10分滿分嘅話，加埋私人感情分，我會畀7分。
黎堅惠：燈光好灰
比想像中好啦，兩個幾小時都好易過。幾詫異係啲燈光冇《穿PRADA的惡魔》做得咁好，尤其係莎拉謝茜嘉柏嘉，塊面成日好灰，唔知係咪得罪咗燈光師。今次focus放少咗喺時裝度，雖然都仲有啲LV袋大特寫，但冇劇集最後兩個season咁，發咗癲，唔理啱唔啱劇情都猛換衫，反而將衫喺宣傳度先做番足，仲OK。
汪詩詩：好睇過劇
10分滿我會畀9分！電影仲好睇過電視劇，我一直有追，最開心係睇到Carrie終於同Mr.Big結咗婚！成套戲好笑好輕鬆，靚女靚衫，啲衫靚得好誇張，我都想要。最深刻就係Samantha啲大膽搞笑嘅對白，好好笑！
採訪：林妙萍 攝影：陳志嵐
