昨日談及之法國人，外號紅酒S，係一位法國酒商，但送咗仔女去芝加哥讀書。佢張卡片上有公司標誌，就係一隻鷹站在一隻熊背脊上，而站在雄鷹頭頂嘅係一隻公雞。左丁山睇見張卡片，一時不明所以，都係律師W見多識廣，立即對紅酒S話：「公司logo反映出你嘅背景，北極熊代表俄羅斯，雄鷹代表美國，公雞自然係法國啦！」紅酒S大讚：「你哋香港人真醒目，一分鐘就睇穿咗，好嘢。我爸爸在莫斯科出世，一早走咗去法國避難，所以我在巴黎出世。後來父親再移民美國，故此我在美國長大。但現在我覺得做法國人更加好，故此放棄咗美籍。」
紅酒S知道香港自六月五日開始，取消一切葡萄酒入口報關手續，政府斗零稅都唔收，故此飛嚟香港搵鬼佬R，睇吓有冇機會谷多啲佢間酒莊嘅出口生意，紅酒S話法國酒今年頭四個月出口到香港旺到不得了，以價值計，比去年同期增加百分之四百，前景大好。既然有一位酒莊老闆在座，我哋當然乘機問吓佢：「近來聽講二○○五年度嘅紅酒好正，炒到飛起！究竟是否物有所值？」
聽見Vintage2005，紅酒S立即眼仔睩睩，飲啖青島啤先至講，我哋畀佢嗰杯白牡丹茶，佢話太淡喎。紅酒S話：「嗱，我敢講一句，我相信以後一生人之中，再唔會見到比二○○五更好嘅葡萄，二○○五紅酒絕對物有所值。二十世紀之中，最好嘅紅酒年份係一九○○、一九二九、一九四五、一九六一，一般人讚得好巴閉嘅一九八二，其實未到上述幾個年份嘅水平，但我膽敢宣佈，二○○五好過二十世紀任何一年，你哋可以放心買入，當藝術品咁樣收藏，任何時候唔要嘅話，可以賣畀我，包你唔蝕本！」講到咁巴閉，去邊度先至買得到呀？紅酒S話佢間酒莊老早買入一千六百箱，但現時冇意思放出住，真係奇貨可居也。話得說回來，紅酒S話任何超過一千美元一瓶嘅紅酒，都係畀俄羅斯、中國、印度三個新興國家嘅「新發財」飲嘅，普通人唔值得嘥錢！